სასკოლო სპორტული ოლიმპიადისთვის მზადება დაიწყო

სასკოლო სპორტლი ოლიმპიადის სამზადისსა და საორგანიზაციო საკითხების შესახებ, სამცხე-ჯავახეთის სამხარეო ადმინისტრაციაში გამართულ სამუშაო შეხვედრაზე იმსჯელეს. შეხვედრას საქართველოს ბავშვთა და სასკოლო სპორტის ეროვნული ფედერაციის, სამხარეო ადმინისტრაციისა და მუნიციპალიტეტების კულტურისა და სპორტის სამსახურების წარმომადგენლები ესწრებოდნენ.

სასკოლო სპორტული ოლიმპიადის სამცხე–ჯავახეთის რეგიონულ თამაშებს, რომელიც სპორტის სხვადასხვა სახეობას მოიცავს, ქალაქი ახალციხე უმასპინძლებს.

ოლიმპიადა საქართველოს ბავშვთა და სასკოლო სპორტის ეროვნული ფედერაციის მიერ მეოთხე წელია ტარდება. წელს მასში 1700-ზე მეტი სკოლის 100 000-მდე მოსწავლე მიიღებს მონაწილეობას.

ახალციხის მერიის ინფორმაციით, ზონალური თამაშები მაისში გაიმართება, ივნისის ბოლოს კი ოლიმპიადის ფინალურ თამაშებში საქართველოს ჩემპიონები გამოავლინდებიან.

ფინალისტები 2018 წლის ჩემპიონის სტატუსს მოიპოვებენ,რომლებიც მომავალი 2019 წლის ჩემპიონებს სუპერფინალში შეხვდებიან და 2020 წელს მსოფლიო სასკოლო ჩემპიონატის საგზურისათვის იბრძოლებენ.

[sknews.ge]