დამოუკიდებლობის დღის აღნიშვნა საქართველოს ჰიმნით დასრულდა

26 მაისის დღესასწაულთან დაკავშირებით ახალციხეში სხვადასხვა კულტურული და სპორტული ღონისძიებები გაიმართა. დამოუკიდებლობის დღის აღნიშვნა დილიდან დაიწყო. 12:00 საათიდან სადგურის მიმდებარე ტერიტორიაზე საბრძოლო ტექნიკის გამოფენა მოეწყო. პარალელურად მიმდინარეობდა ღონისძიებები ახალციხის ციხის ტერიტორიასა და მ.იაძის სახელობის ახალციხის ცენტრალურ სტადიონზე.

დღის მეორე ნახევარში კი ახალციხის ციხის ტერიტორიაზე ადგილობრივი ქორეოგრაფიული და ფოლკლორული ანსამბლების კონცერტი გაიმართა. საღამოს რვა საათზე კი ახალციხის ციხეში შეკრებილი მოსახლეობისთვის თამრიკო ჭოხონელიძემ და თეატრალრმა კვარტეტმა იმღერეს.

"ჩემთვის დიდი პატივია, რომ დღეს აქ ვარ და ახალციხელი მაყურებლის წინაშე წარვსდგები. ყველას ვულოცავ დღევანდელ დღეს და მე მინდა, რომ ის შეგნება, რა შეგნებითაც დღეს არის ჩვენი ხალხი, მომავალში უფრო გაღრმავებულიყოს. ერთ-ერთი სიმღერის ტექსტში პეტრე გრუზინსკის შესანიშნავი სიტყვებია "მე როგორ ვიყო მდუმარე, სიჩუმეც მოუბარია“, დღეს სწორედ სიჩუმეც მოუბარია ძალიან დიდ გამარჯვებაზე, მომავალზე და იმედზე“, - ამბობს თამრიკო ჭოხონელიძე.

ახალციხელი მაყურებლის წინაშე რამდენიმე ცნობილი სიმღერით წარსდგა თეატრალურის კვარტეტიც.

"ამ ულამაზესი კუთხიდან, მესხეთიდან მთელ საქართველოს ვულოცავთ დამოუკიდებლობის დღეს და ალბათ, ნებისმიერი ჩვენგანისთვის თავისუფლება ყველაზე მნიშვნელოვანია ცხოვრებაში. ძალიან გვიხარია, რომ დღეს ახალციხეში ვართ და დიდი სითბო და სიყვარული ტრიალებს ამ ლამაზ კუთხეში“, - ამბობს თეატრალური კვარტეტის წევრი ლაშა კერვალიძე.

კონცერტის დასასრულს თამრიკო ჭოხონელიძემ საქართველოს ჰიმნი შეასრულა. რის შემდეგაც დღევანდელი ღონისძიებები ფეიერვერკით დასრულდა. კონცერტს ადგილობრივი თვითმმართველობის წარმომადგენლებიც ესწრებოდნენ.

დღევანდელი ღონისძიებებები ახალციხის მუნიციპალიტეტის გამგეობისა და ახალციხის ციხის ადმინისტრაციის ორგანიზებით გაიმართა.

"პირველ რიგში მთელ საქართველოს მივულოცავ დღევანდელ დღეს და გამთლიანებას ვუსურვებ“, - ამბობს ახალციხის ციხის დირექტორი გუჯა ბიჭაშვილი.

ახალციხის მუნიციპალიტეტის საკრებულოს თავმჯდომარის ოლეგ სანდროშვილის განმარტებით, დღევანდელი ღონისძიებებისთვის ძირითადი თანხა ცენტრალური ბიუჯეტიდან გამოიყო.



[თამარ თოთაძე, ახალციხე]