ლომჯარია: საჯარო სივრცეში სექსუალური შევიწროების შემთხვევები განსაკუთრებით პრობლემურია

"სამწუხაროდ, სექსუალური შევიწროება, როგორც საჯარო სივრცეში, ისე დასაქმების ადგილზე დამკვიდრებულ პრაქტიკას წარმოადგენს. სტერეოტიპული დამოკიდებულება და რეაგირების მექანიზმის არარსებობა პრობლემას უფრო მასშტაბურს ხდის. კრიტიკულად დაბალია შემთხვევათა გამოვლენის მაჩვენებელი, განსაკუთრებით პრობლემურია საჯარო სივრცეში სექსუალური შევიწროების შემთხვევები", – ვკითხულობთ სახალხლო დამცველის განცხადებაში.

ომბუდსმენის თქმით, მიუხედავად იმისა, რომ 2017 წელს რატიფიცირებული ევროპის საბჭოს კონვენცია „ქალთა წინააღმდეგ ძალადობისა და ოჯახში ძალადობის აღკვეთისა და პრევენციის შესახებ“ პირდაპირ ითვალისწინებს სექსუალური შევიწროების საკანონმდებლო დეფინიციას, სარატიფიკაციო პაკეტში აღნიშნული საკითხი ვერ მოხვდა.

საქართველოს სახალხო დამცველი მნიშვნელოვნად მიიჩნევს, რომ უახლოეს პერიოდში განხორციელდეს შესაბამისი საკანონმდებლო ცვლილებები სექსუალური შევიწროების დეფინიციისა და მასზე რეაგირების პროცედურების დადგენის მიზნით. ამასთან აუცილებელია ხელი შეეწყოს მოსახლეობის ცნობიერების ამაღლებას და პრევენციის სხვა ღონისძიებებს.

საქართველოს სახალხო დამცველი გამოთქვამს მზადყოფნას ითანამშრომლოს დაინტერესებულ პირებთან, დაეხმაროს კერძო და საჯარო უწყებებს სექსუალური შევიწროების რეგულაციების შემუშავებასა და დასაქმებულთა ცნობიერების ამაღლების მიმართულებით. ამასთან, კანონმდებლობით მინიჭებული მანდატის ფარგლებში, საქართველოს სახალხო დამცველი შეისწავლის დასაქმების ადგილზე სექსუალური შევიწროების შემთხვევებს.

დაინტერესებულ პირებს შესაძლებლობა აქვთ მიმართონ სახალხო დამცველის აპარატის ოფისებს, მიაწოდონ ინფორმაცია ელექტრონულად ან ცხელი ხაზის 1481 მეშვეობით.

[sknews.ge]