სასამართლომ ახალციხის სასაკლაო 1000 ლარით დააჯარიმა

ახალციხის რაიონული სასამართლოს მოსამართლემ გიორგი ლონდარიძემ გადაწყვეტილება დღეს, 16 ოქტომბერს გამოაცხადა. მან ახალციხის სასაკლაო შპს „აგროფუდი–ახალციხე“ ადმინსიტრაციული სამართალდარღვევათა კოდექსის ორი მუხლით, მდინარის დაბინძურებისთვის და წყლის უკანონო მოპოვებისთვის 1 000 ლარით დააჯარიმა.

გარდა ამისა, შპს „ახალციხე–აგროფუდს“ გარემოზე მიყენებული ზიანის 316 ლარისა და 37 თეთრის გადახდაც დაეკისრა.

შეგახსენებთ, რომ გარემოსდაცვით ზედამხედველობის დეპარტამენტმა „ახალციხე–აგროფუდის“ მიერ მდინარის დაბინძურების შესაძლო ფააქტის შესწავლა „სამხრეთის კარიბჭიდან“ შესული ინფორმაციის საფუძველზე დაიწყო. სასაკლაო მდინარე ფოცხოვში დაკლული ცხვრის სისხლს უშვებს. გარდა ამისა, დეპარტამენტის მიერ სასაკლაოს შემოწმების შემდეგ გაირკვა, რომ კომპანია წყალს უნებართვოდ მოიპოვებდა.

[თამუნა უჩიძე, ახალციხე]