მესხეთის თეატრი დღეს გორის თეატრს უმასპინძლებს

მესხეთის თეატრის ცნობით, გორის გიორგი ერისთავის სახელობის სახელმწიფო დრამატული თეატრი მაყურებლის წინაშე აცოცხლებს ქართველებისთვის ერთ-ერთი ყველაზე მძიმე და ამაღელვებელ თემას, ქართულ-აფხაზურ დაპირისპირებას. სიუჟეტი უკვე ლეგენდად ქცეულ სოფელ კამანის დაპყრობაზეა.

"რეჟისორ სოსო ნემსაძის ის ოსტატობა, რომლის წყალობითაც ეს სპექტაკლი საინტერესო, ახლობელი და ერთი ამოსუნთქვით სანახავი გახდა მაყურებლისთვის, დატვირთულია მთელი რიგი ემოციური სცენებით. სპექტაკლის გმირები სცენაზე იხოცებიან, ცოცხლდებიან და ეს ხდება ისე, რომ მნახველი ამ სიკვდილ-სიცოცხლის მიზეზებს თანდათან, მოქმედების მსვლელობის პარალელურად იგებს, რომლის კულმინაციაც ფინალია", – აცხადებენ მესხეთის თეატრში.

შეგახსენებთ, გუშინ, 10 ოქტომბერს, მესხეთის თეატრში ეროვნული დრამატურგიის ფესტივალი დაიწყო. ფესტივალი გაიხსნა თავისუფალი თეატრის სპექტაკლით „სხვების ცხოვრება“( რეჟ. ავთ. ვარსიმაშვილი).

ფესტივალის ფარგლებში მაყურებელი 20 წარმოდგენას იხილავს. ბილეთის ფასი 5 ლარია, აბონემენტის შეძენის შემთხვევაში კი მაყურებელს სპექტაკლის ნახვა 2.50 ლარად შეეძლება. თეატრის ადმინისტრაციის განმარტებით, იქნება ორი აბონემენტი, თითოეულში 10 სპექტაკლი გაერთიანდება და ერთი აბონემენტის ფასი 25 ლარი იქნება.

[sknews.ge]