ახალციხეში დრამატურგიის საერთაშორისო თეატრალური ფესტივალი გაიმართება

ფესტივალი, მესხეთის თეატრში, 13 სექტემბერს, თავისუფალი თეატრის სპექტაკლით გაიხსნება და 13 ოქტომბერს დაიხურება. როგორც თეატრში აცხადებენ, გახსნაც და დახურვაც გრანდიოზული იქნება და მაყურებლისთვის სიურპრიზად დატოვებენ.


„ჩვენთან ჩამოვლენ შემდეგი თეატრები: ქუთაისის, ჭიათურის, ცხინვალის, ფოთის, დმანისის, ბათუმის, ოზურგეთის, რკინის თეატრი, გორის, თელავის, ზესტაფონის, სენაკის, რუსთავის, ამბროლაურის; ასევე – ახმეტელის, მარჯანიშვილის, მოზარდ მაყურებელთა, რუსთაველის, სამეფო უბნის, თუმანიშვილის თეატრები; უკრაინიდან გვეწვევა ნიკოლაევის და ხერსონის თეატრები. ფესტივალში მონაწილეობას მიიღებენ თეატრალური დასები ყაზახეთიდან, სომხეთიდან, ბელორუსიიდან და პოლონეთიდან,“ – გვითხრა მესხეთის თეატრის სამხატვრო ხელმძღვანელმა ლია სულუაშვილმა.

მისივე თქმით, ეროვნული დრამატურგიის ფესტივალში პირველად მიიღებენ მონაწილეობას უცხოეთიდან ჩამოსული თეატრები.

"ფესტივალი ემსახურება ქართული დრამატურგიის პოპულარიზაციას, წახალისებასა და განვითარებას“, – ამბობს სულუაშვილი.

ფესტივალის ჩატარება თეატრს დააახლოებით 50 000 ლარამდე დაუჯდება. თეატრის ხელმძღვანელობის თქმით, სპექტაკლებზე დასწრება შესაძლებელი იქნება, როგორც ერთჯერადად ბილეთის შეძენით, ისე – აბონემენტით.

დრამატურგიის მეხუთე საერთაშორისო თეატრალური ფესტივალის ფარგლებში, მესხეთის თეატრის სცენაზე 31 სპექტაკლი გაიმართება.

[მარიამ ბარძიმაძე, ახალციხე]