ცოფთან ბრძოლის საერთაშორისო დღესთან დაკავშირებით ახალციხეში უფასო ვაქცინაცია მიმდინარეობს

სურსათის ეროვნული სააგენტოს ვეტერინარები მობილიზებული არიან თბილისში, ქუთაისში, ზუგდიდში, თელავში, რუსთავში, ახალციხეში, მცხეთაში, გორში, ბათუმში, ოზურგეთსა და ამბროლაურში. თბილისში აქციაში ჩართულები არიან მერიის ცხოველთა მონიტორინგის სააგენტოს წარმომადგენლები, რომლებიც ცრიან როგორც თავშესაფრის ბინადარ, ასევე თავშესაფრის გარეშე დარჩენილ ძაღლებს და კატებს.
ცოფის საწინააღმდეგო პროფილაქტიკური ვაქცინაცია 28 სექტემბერსაც გაგრძელდება.

ცოფის საწინააღმდეგო აცხები მიმდინარეობს ახალციხეშიც. ნებისმიერ მსურველს ძაღლის და კატის ასაცრელად სურსათის უვნებლობის სამსახურის სამცხე–ჯავახეთის რეგიონული სამსახურს უნდა მიმართონ, რომელიც ახალქალაქის გზატკეცილზე, ხელოვნური ტბის მიმდებარე ტერიტორიაზეა.

სამსახურის უფროსის ლია ბექაურის განმარტებით, დღეს, 27 სექტემბერს უკვე ოთხი ძაღლი აცრეს:“ ცოფზე აცრა ყოველთვის უფასოა და ჩვენ წლის დასაწყიდან ვატარებთ ღონისძიებებს და სოფლებშიც ვცრით. რადგან ცოფის საერთაშორისო დღეა გამოცხადებული ველდოებით, რომ ცხოველები ჩვენთან ოფისში მოიყვანონ“.

ცოფი მწვავე ინფექციური დაავადებაა, რომელიც გადადის დაავადებული ცხოველების დაკბენით, დაკაწვრით ან დადორბვლით. ცოფით ავადდება ადამიანიც.

მსოფლიოში ცოფით ყოველწლიურად 55 ათასი ადამიანი იღუპება.

ცოფის საწინააღმდეგო პროფილაქტიკურ ვაქცინაციას სურსათის ეროვნული სააგენტო პერმანენტულად ახორციელებს. 2015 წლის დასაწყისიდან დღემდე, წინასწარი მონაცემებით, ვაქცინირებულია 203 061 ძაღლი და კატა. იძულებით აიცრა 30 282 სული დაავადების ამთვისებელი ცხოველი, რაც შედეგზეც აისახა - 2015 წელს საქართველოში ცოფით ადამიანის დაავადების არცერთი ფაქტი არ დაფიქსირებულა.

[sknews.ge]