შეხვედრა ზანავის სპორტულ – საგანმანათლებლო ცენტრში, არაფორმალურ გარემოში, 23 სექტემბერს, გვიან საღამოს შედგა. იატაკზე, სკამებსა და საჭიდაო ლეიბებზე მსხდომი ადგილობრივები თითქმის ორი საათის განმავლობაში ისმენდნენ ამბებს იმის შესახებ, როგორ შეძლეს საქართველოს სხვადასხვა კუთხეში მცხოვრებმა, მათნაირმა ადამიანებმა, თავიანთი საქმიანობა წამოეწყოთ, პროდუქცია ეწარმოებინათ და მერე ეს პროდუქტი ევროპის ქვეყნებში გაეყიდათ.
ადგილობრივებს ევროპის სიკეთეებზე მწერალი დავით ტურაშვილი უყვებოდა, რომელმაც ზანაველებს თავისი წიგნების შესახებაც მოუთხრო და ეს წიგნები, ავტოგრაფებით, აჩუქა კიდეც.
არასამთავრობო ორგანიზაცია მედიის განვითარების ფონდის ხელმძღვანელი თამარ კინწურაშვილი, მასპინძლებს ანტიდასავლური დეზინფორმაციის შესახებ უყვებოდა. იგი უხსნიდა, როგორ შეიძლება ფოტომანიპულაციებით მოქალაქეების შეცდომაში შეყვანა და როგორ უნდა გავარჩიოთ, რამდენად სანდოა ამბავი რომელსაც ესა თუ ის პირი, ან მედია გვაწვდის. ასევე, თამარი იხსენებდა კონკრეტულ მაგალითებს, მასალებსა და პუბლიკაციებს, რომელთა მიზანი ევროპის შესახებ მცდარი შეხედულებების დანერგვა იყო.
დავით ტურაშვილისა და თამარ კინწურაშვილის შემდეგ, გამომსველების რიგში ჟურნალისტმა ლიკა ბასილაია–შავგულიძემ გადაინაცვლა. ადგილობრივებს ჟურნალისტი ევროპის ბაზრებზე მოხვედრილი კონკრეტული მეწარმეების ისტორიებს უყვებოდა.
„მაღალმთიან რეგიონებს ეკონომიკური დატვირთვის დიდი პოტენციალი აქვთ. ვხედავ რომ აქ ქალები არიან შედარებით პასიურები, მამაკაცები აქტიურები კი არიან, მაგრამ, არიან პოლიტიზებულები. ამ დროს შეიძლება, რომ მათ ეს აქტიურობა სხვა კუთხით წარმართონ და ჩვენ გვინდა, რომ მათში გავაღვივოთ ნაპერწკალი, დაინტერესება და ეს აქტივობა მაგალითად, ბიზნეს სფეროში გადაიტანონ, საქმე წამოიწყონ. მე მიმაჩნია, რომ არასამთავრობო სტრუქტურები, სამთავრობო სტრუქტურები, ბიზნესები, ასე, სოფელ–სოფელ უნდა დადიოდნენ, ხალხს ხვდებოდნენ, და უზიარებდნენ სასარგებლო ინფორმაციას, როგორ უნდა გახდნენ წარმატებული აგრომეწარმეები“, – განაცხადა შეხვედრის დასრულების შემდეგ, კვლევითი ჟურნალისტიკის და ადვოკატირების ცენტრის დამფუძნებელმა და eugeorgia.info-ს მთავარმა რედაქტორმა ლიკა ბასილაია – შავგულიძემ.
„არ მინდა ადამიანებს ეგონოთ, რომ მას იმიტომ აკლია ან წიგნი, ან ადამიანი, რომ ის თბილისში არ დაიბადა და ვაკეში არ გაიზარდა, ამიტომ ყველგან დავდივარ სადაც მეპატიჟებიან“, – ასეთი იყო დავით ტურაშვილის კომენტარი შეხვედრის დასრულების შემდეგ, – „ძალიან მინდა დაიჯერონ ადამიანებმა, რომ მათზეა დამოკიდებული უკეთესი ხვალინდელი დღე და ამის ახსნას სულ ვცდილობ“.
სოფელ ზანავში შეხვედრას საქართველოში ამერიკის ელჩის მოადგილე ელიზაბეთ რუდი და ამერიკის საელჩოს წარმომადგენლები ესწრებოდნენ.
„არასამთავრობო ორგანიზაციების წარმომადგენლები მოვიდნენ USAD-ის პროგრამის ფარგლებში და ამ პროგრამის მიზანი ზუსტად არის ხალხის ჩართულობის ხელშეწყობა. იმიტომ, რომ ჩვენ ვფიქრობთ, რომ როდესაც ხალხი ჩართულია საზოგადოებაში, მთავრობა ემსახურება ხალხს. გარდა ამისა, აშშ მხარს უჭერს საქართველოს მისწრაფებას გახდეს ევროატლანტიკური ინსტიტუციების წევრი და ამ შეხვედრის კიდევ ერთი მიზანი იყო ევროატლანტიკური ინტეგრაციის შესახებ ინფორმაციის გაზიარება. განსაკუთრებით ევროკავშირთან თავისუფალი ვაჭრობის შესახებ შეთანხმება და ამ შეთანხმების შესაძლებლობები სოფლის ხალხისთვის“, – ქართულ ენაზე გვესაუბრა ელიზაბეთ რუდი, რომელიც საქართველოში, თბილისში, 2017 წლის ივლისში ჩამოვიდა. ამ პოზციის დაკავებამდე იგი მუშაობდა პოლიტიკურ მრჩევლად ქაბულში, ავღანეთში 2014-2016 წლებში.
სოფელ ზანავში შეხვედრა "სამოქალაქო საზოგადოების განვითარების და მოქალაქეთა ჩართულობის პროგრამის" ფარგლებში შედგა. პროგრამა ხუთწლიანია და მისი ერთ–ერთი მიზანია სამოქალაქო საზოგადოება, ორგანიზაციები, რომელთა საქმიანობა ქვეყნის წინსვლას უკავშირდება, საქართველოს სხვადასხვა კუთხეში მცხოვრებ ადგილობრივებს შეხვდნენ. შეხვედრა ყველა კუთხეში ყველა სოფელში არაფორმალურ გარემოში მიმდინარეობს და თემაც ხშირად სხვადასხვაა, გამომდინარე ადგილობრივებისა და კუთხის საჭიროებებიდან.
„ბოლო პერიოდში ძალიან საინტერესო საკითხი გახდა ჩვენი პროდუქციის ევროპის ბაზარზე გატანა და ამის შესახებ ინფორმაციის მიწოდება და კონსულტაციები არის ძალიან მნიშვნელოვანი. ასევე, იმის ახსნა როგორ გავარჩიოთ მართალი ინფორმაცია ტყუილისაგან, ძალიან საჭიროა, რადგან ხშირია დეზინფორმაციები და ფოტომანიპულაციები“, – ამბობს პროგრამის ხელმძღვანელის მოადგილე ეკა იმერლიშვილი.
მისივე თქმით, სამცხე–ჯავახეთში ორი სოფელი შეირჩა, ზანავი – ადიგენში და გოგაშენი – ახალქალაქში და ეს შემთხვევითი არ ყოფილა: „ვცდილობთ ისეთ სოფლებში ჩავიდეთ, სადაც არასამთავრობო სექტორი ნაკლებად მუშაობს და პოლიტიკოსებისთვისაც ნაკლებად საინტერესოა. ამ ეტაპზე სამცხე–ჯავახეთში იმიტომ შევარჩიეთ, რომ NDI-ს ბოლო კვლევებით, პროდასავლურ ორიენტაციაზე, ევროპულ ღირებულებებზე, ყველაზე ნაკლები ინფორმაცია აქვთ ეთნიკურ უმცირესობებს. ამიტომ ვიფიქრეთ, რომ მნიშვნელოვანი იქნებოდა ეს შეხვედრები“.
[ნინო ნარიმანიშვილი, ადიგენი]