ვასილ კვინცხაძის შემოქმედებითი საღამო ახალციხეში

შემოქმედებითი საღამო სახელწოდებით ”მესხი პოეტის შემოქმედება” ახალციხის კულტურის სამსახურის ინიციატივით მოეწყო. საღამოს ვასილ კვინცხაძის ახლობლები, მეგობრები და ადგილობრივი თვითმმართველობის სამსახურის წარმომადგენლები ესწრებოდნენ.

ვასილ კვინცხაძის ლექსები მისმა ახლობლებმა წაიკითხეს. მის ლექსებზე შექმნილი სიმღერები კი ზაზა თამარაშვილის გუნდმა ”მესხეთმა” შეასრულა.

”ძალიან კარგი შეგრძნებაა, როცა ამდენი ხალხი გაფასებს და ასეთ შეხვედრას გიწყობენ, 76 წლის ვარ და თავს 25 წლის ახალგაზრდად ვგრძნობ, ისე აღმაფრთოვანა ამ სიკეთემ”, - ამბობს ვასილ კვინცხაძე.

საღამოს დასასრულს მუნიციპალიტეტის გამგებლის მოადგილემ თამარ გოგოლაძემ ვასილ კვინცხაძეს სიმბოლური საჩუქარი საქართველოს სურათების კატალოგი გადასცა.

ვასილ კვინცხაძე 1937 წლის 23 ნოემბერს ბორჯომის მუნიციპალიტეტის სოფელ დგვარში დაიბადა. 1957 წელს სოფელ ტაძრისის საშუალო სკოლა დაამთავრა და ამავე წელს თვითშემოქმედების კულტურულ-საგანმანათლებლო სასწავლებლის ქორეოგრაფიულ განყოფილებაზე ჩაირიცხა. სასწავლების დამთავრების შემდეგ წლების განმავლობაში ადიგენის მუნიციპალიტეტის სოფელ უდის კულტურის სახლის სამხატვრო ხელმძღვანელად მუშაობდა. 1965 წლიდან ახალციხის სარაიონო კულტურის სახლის ქორეოგრაფად და სამხატვრო ხელმძღვანელად მუშაობდა. 1975 წელს საკავშირო ფესტივალის ლაურეატი გახდა. 1992-2006 ლებში კი სამცხე-ჯავახეთის რეგიონის ძეგლთა დაცვის ინსპექტორად მუშაობდა.
2000 წელს ღირსების ორდენი მიენიჭა. არის მრავალგზის გამარჯვებული მხატვრული კითხვის კონკურსში - ”კითხულობს პედაგოგი”.

ვასილ კვინცხაძეს რამდენიმე კრებული აქვს გამოცემული, სადაც საკუთარი ლექსებია შესული. უახლოეს მომავალში კი კრებულის გამოცემას გეგმავს. იგი ახალგაზრდებს ქართულ ცეკვას ასწავლის.

ახალციხის მუნიციპალიტეტის კულტურის სამსახურში განმარტავენ, რომ მსგავსი საღამოების გაართვა ტრადიციულ ხასიათს მიიღებს.


[თინათინ ზაზაძე, ახალციხე]