ვასილ მაღლაფერიძე საზოგადოებრივი მაუწყებლის დირექტორი გახდა

საზოგადოებრივი მაუწყებლის ხელმძღვანელის შესარჩევად მეორე ტური გახდა საჭირო. მეორე ტურის მეორე კენჭისყრით, ვასილ მაღლაფერიძის კანდიდატურას მხარი სამეურვეო საბჭოს ექვსმა წევრმა დაუჭირა, ხოლო თინათინ ბერძენიშვილის კანდიდატურას - ორმა.

პირველ ეტაპზე ყველაზე მეტი – 4 ხმა ვასილ მაღლაფერიძემ და 2 – თინათინ ბერძენიშვილმა მიიღეს.

გენერალური დირექტორის ვაკანტურ თანამდებობაზე გამოცხადებულ ღია კონკურსში მონაწილეობას სულ 14 კანდიდატი იღებდა. მეორე ტურში მხოლოდ 5 მათგანი გადავიდა: თინათინ ბერძენიშვილი, ვასილ მაღლაფერიძე, ნინო ზაუტაშვილი, ზაალ ანჯაფარიძე და ნათია კუპრაშვილი.

საზოგადოებრივი მაუწყებლის გენერალური დირექტორის პოსტი ვაკანტური 21 ნოემბრიდან გახდა, როცა ყოფილმა დირექტორმა გიორგი ბარათაშვილმა თავისი 6-წლიანი ვადის ამოწურვამდე ორი წლით ადრე თანამდებობა დატოვა.

სამეურვეო საბჭომ ახალი დირექტორი 6 წლის ვადით აირჩია.

ვასილ მაღლაფერიძე 2014 წლიდან 2016 წლის 31 აგვისტომდე იყო GDS–ის გადაცემა „2030“-ის გენერალური პროდიუსერი. 2012 წელს ტელეკომპანია “მეცხრე არხის” დირეტორის მოადგილე. 1999-2004 წლებში – საქართველოს პარლამენტის წევრი, ხოლო 2005-2008 წლებში – სახელმწიფო რწმუნებული.

[sknews.ge]