სოფელ რუსთავის ტყეში ხანძარია

საგანგებო სიტუაციების მართვის სამსახურში ხანძრის შესახებ შეტყობინება შევიდა და სახანძრო ჯგუფები უკვე ადგილზე არიან, თუმცა ტყის ტერიტორიაზე რა იწვის, უწყებას ამის შესახებ ინფორმაცია ჯერ არ აქვს.

სოფელ რუსთავის მკვიდრები ამბობენ, რომ ტყის ტერიტორიაზე სათიბებია, ამიტომ ცეცხლი სათიბებს უკიდია თუ ტყის მასივს, ეს არც მათ იციან.

სოფელ რუსთავის დეპუტატის ჯემალ იაკობიძის თქმით, ტერიტორია, სადაც ხანძრია მიუდგომელი ადგილი არ არის და სახანძრო ჯგუფებს ცეცხლის ჩაქრობა არ გაუჭირდებათ. ცეცხლის შესახებ ინფორმაცია, საგანგებო სიტუაციების მართვის სამსახურს მან მიაწოდა.

„ბიჭები იყვნენ ტყეში, დაუნახავთ და დამირეკეს ხანძარია, მეც სახანძროს გამოვუძახე, ზუსტად რა იწვის არ ვიცი, მაგრამ სოფლიდან ვხედავთ, რომ ცეცხლი საკმაოდ დიდ ფართობს უკიდია“, – გვეუბნება ჯემალ იაკობიძე.

ჯემალ იაკობიძის თქმით, იგივე ტერიტორიაზე ხანძარი, დაახლოებით ხუთი წლის წინაც გაჩნდა და სამი ჰექტარი ტყის მასივი დაიწვა.

ადგილი, სადაც ხანძარია, სოფელ რუსთავიდან 12 კმ–ის დაშორებით არის, ამიტომ დასახლებულ პუნქტს საშიშროება არ ემუქრება.



[ლუბა გიორგაძე, ასპინძა]