ადამიანის უფლებათა კომიტეტმა კვოტირების შესახებ კანონპროექტს მხარი დაუჭირა

დეპუტატი დიმიტრი ცქიტიშვილი ფიქრობს, რომ ამ კანონპროექტის მიღება იქნება ერთ-ერთი ყველაზე პროგრესული ნაბიჯი, რომელიც პარლამენტმა შეიძლება გადადგას.

"რატომ არის პოლიტიკაში ქალთა მონაწილეობის გაზრდა მნიშვნელოვანი? იმიტომ რომ არსებობს მანკიერი წრე, რომლის გარღვევა მხოლოდ მაშინ მოხდება, როდესაც ქალების მეტი წარმომადგენლობა იქნება პოლიტიკაში. ის პრობლემები, რომლებიც ხშირად ისმის ამ დარბაზში – ქალთა დისკრიმინაცია, ქალთა მიმართ ძალადობა, ქალთა ფემიციდი, უკავშირდება იმას, რომ ხშირ შემთხვევაში პოლიტიკურ პროცესში არ არის ჩართული ის ჯგუფი, რომელმაც ყველაზე მკაფიოდ და კარგად იცის როგორ მოუაროს ამ პრობლემებს. რაც არ უნდა სენსიტიური იყოს კაცი, ქალს უკეთ შეუძლია ამ პრობლემების მოგვარება, შესაბამისად ქალის მონაწილეობა პოლიტიკაში არის ძალიან მნიშვნელოვანი“, – განაცხადა დეპუტატმა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე, რომელმაც განიხილა საქართველოს პარლამენტში 37450 მოქალაქის ხელმოწერით შეტანილ საკანონმდებლო წინადადება.

კანონპროექტის ავტორია ქალთა პოლიტიკაში მონაწილეობის სამუშაო ჯგუფი (Task force). კანონპროექტის მიხედვით, არსებულ საარჩევნო სისტემაში, თუ პროპორციული სიის 50%-ს ქალები დააკომპლექტებენ, მათი წარმომადგენლობა პარლამენტში მინიმუმ 25%იანი იქნება.

კანონპროექტის თანახმად, საპარლამენტო და ადგილობრივი თვითმმართველობის არჩევნებში, პარტიული სიების წარდგენისას, პარტიებს დაევალებათ დაიცვან სქესთა ბალანსი ისე, რომ პარტიულ სიაში ყოველი მეორე წარადგინონ განსხვავებული სქესის კანდიდატი. წინააღმდეგ შემთხვევაში, ცენტრალური საარჩევნო კომისია პარტიას დაუბრუნებს სიას ხარვეზის აღმოსაფხვრელად, ხოლო ხარვეზის აღმოუფხვრელობის შემთხვევაში პარტია ვერ გაივლის რეგისტრაციას. გარდა ამისა, პარლამენტის, ასევე საკრებულოს წევრის მიერ მანდატზე უარის თქმის შემთხვევაში, მის ადგილს დაიკავებს იმავე სიაში რიგით მომდევნო იმავე სქესის კანდიდატი

კანონპროექტმა კანონის სახე რომ მიიღოს, მას მხარი კიდევ ორმა, იურიდიულმა და რეგიონული პოლიტიკის კომიტეტებმა უნდა დაუჭიროს, შემდეგ კი პარლამენტმა სამი მოსმენით დაამტკიცოს.

[ნინო ნარიმანიშვილი, ახალციხე]