სვირში ხანძარი ლოკალიზებულია, საგანგებო შტაბი მუშაობას აგრძელებს [Photo]

მთავარი → სიახლე, საზოგადოება 29.08.2017

ახალციხეში, სოფელ სვირში, ხანძარი ლოკალიზებულია, თუმცა, ადგილზე რჩება ცოცხალი ძალაც, სახანძრო ტექნიკაც და ავიაციაც და მიმდინარეობს მუშაობა ხანძრის ლიკვიდაციაზე. ადგილზე ისევ რჩება შინაგან საქმეთა მინისტრი, საგაგებო რეჟიმში მუშაობს სპეციალური შტაბიც.

სპეციალური შტაბი სოფელ სვირში, დღეს, დილიდან შეიქმნა. შტაბი სოფელში, ხანძრიდან რამდენიმე კილომეტრშია. იმის გამო, რომ გზა მიუვალია, სოფელში, შტაბთან ახლოს რჩება მედიაც.

შეგახსენებთ, გუშინ, 28 აგვისტოს, ხანძარი გაჩნდა ახალციხეში, სოფელ სვირის ტყეში. გუშინვე ადგილზე ჩავიდა საქართველოს შინაგან საქმეთა მინისტრი გიორგი მღებრიშვილი.

ადგილი მიუვალია, ამიტომ, დღეიდან ცეცხლის ჩაქრობის პროცესში ვერტმფრენი ჩაერთო. სვირში ცეცხლი შერეულ ტყეს უკიდია, შინაგან საქმეთა მინისტრის, გიორგი მღებრიშვილის თქმით, რომელიც სტიქიის ზონაში იმყოფება, ცეცხლის წიწვოვან ტყეში გავრცელების საშიშროება არ არსებობს

დღეს სვირში პარაკლისი გადაიხადა ახალციხისა და ტაო–კლარჯეთის მიტროპოლიტმა მეუფე თეოდორემ.

[ნინო ნარიმანიშვილი, თინათინ ზაზაძე, ახალციხე]