გიორგი ჟვანიას დაპირებები ”ოცნების” ახალქალაქელ აქტივისტებს

თბილისში, 4 აპრილს გამართულ აქციაში, ახალქალაქელი და ნინოწმინდელი აქტივისტები, დაახლოებით 500 ადამიანი მონაწილეობდა. მიტინგის მოწყობის მთავარ მიზეზად მონაწილეები ჯავახეთში სეპარატიზმის არსებობის შესახებ საქართველოს პრეზიდენტის განცხადების უარყოფას ასახელებდნენ. თუმცა ამასთან ერთად, მკაცრად დაისვა საკითხი, რომ ახალქალაქში დღემდე ოფიციალურად არ არსებობს „ქართული ოცნების“ ოფისი და აქტივისტები, რომლებიც წინასაარჩევნო და არჩევნების პერიოდში ბლოკ „ქართული ოცნებისთვის“ იბრძოდნენ, დღემდე გაურკვეველ მდგომარეობაში არიან.

ხალხს პრემიერ-მინისტრ ბიძინა ივანიშვილთან შეხვედრა უნდოდა. თუმცა, მათთან მხოლოდ საქართველოს რეინტეგრაციის მინისტრი პაატა ზაქარეიშვილი მივიდა.

10 დღის შემდეგ, 15 აპრილს, ახალქალაქში საქართველოს პარლამენტის დეპუტატი და ახალქალაქში კოალიციის წინასაარჩევნო შტაბის ყოფილი ხელმძღვანელი გიორგი ჟვანია ჩავიდა. მისი ვიზიტის მიზანი აქტივისტების კითხვებზე პასუხის გაცემა იყო.

გიორგი ჟვანიასთან შეხვედრა „ქართული ოცნების“ ყოფილ შტაბში ჩატარდა. დეპუტატთან შესახვედრად „ოცნების“ აქტივისტების გარდა უამრავი ხალხი მივიდა, ვისაც სხვადასხვა ხასიათის პრობლემები ჰქონდა. ისინი დეპუტატს პირადი პრობლემებით მიმართავდნენ, თუმცა ჟვანიამ განაცხადა, რომ თავად რაიმე დაპირების მიცემა არ შეუძლია, რადგან შესაბამის ინფორმაციას არ ფლობს და ამ საკითხებით მათ შეუძლიათ უკვე „ქართული ოცნების“ ოფისს მიმართონ, რომელიც ახალქალაქში მალე ამუშავდება.

გიორგი ჟვანიას თქმით, აქტივისტების აქციამ საქართველოს მთავრობის ყურადღება მიიქცია და იგი ჩავიდა, რათა დაგროვილ კითხვებს პასუხი გასცეს.

„ბიძინა ივანიშვილმა აქ არსებული პრობლემების შესწავლა შესაბამის ადამიანს დაავალა. პრობლემა ის იყო, რომ დღემდე აქ რეგიონული სამსახურები არ არსებობდა. ახლა რეგიონული სამსახური იქმნება და მას ირაკლი მენუაშვილი უხელმძღვანელებს. ცვლილებები რაიონში თანდათანობით დაიწყება და რაც მთელ საქართველოში მოხდა, ნელ-ნელა აქაც განხორციელდება. ცვლილებები იქნება გამგეობაში და ყველა ადგილას“, - განაცხადა საქართველოს პარლამენტის დეპუტატმა გიორგი ჟვანიამ.

მისი თქმით, ხალხი, ვინც იბრძოდა, დამსახურებისამებრ მიიღებს პასუხს და ამ ყველაფერს გაითვალისწინებენ.

გიორგი ჟვანიამ ასევე განაცხადა, რომ თავად ხალხმა თანდათანობით უნდა შეცვალოს საკუთარი რაიონი, ცენტრალური ხელისუფლება, პარლამენტი, მთავრობა, თავის მხრივ, დაეხმარება მათ და მალე ახალი, უკეთესი თვითმმართველობა ექნებათ.

„ქართული ოცნების“ აქტივისტი აკოფ ქოსიანი შიშობს, რომ სანამ ახალქალაქში ოფისი გაიხსნება, ყველა ადგილობრივი ხელმძღვანელი რიგრიგობით ბლოკის წევრ პარტიებში გადავა, რათა თანამდებობები შეინარჩუნონ და „ნაციონალები“, რომლებიც წინასაარჩევნო პერიოდში „ოცნების“ ხალხს პრობლემებს უქმნიდნენ, კვლავ ხელისუფლებაში დარჩებიან.

გიორგი ჟვანიას თქმით, ჩინოსნების ბლოკის წევრ პარტიებში გადასვლა არ ნიშნავს, რომ ისინი თავიანთ თანამდებობებზე აუცილებლად დარჩებიან.

„საკრებულოში ყველა ადამიანს საკუთარი ადგილის მონახვა უნდა. ისინი ერთი ფრაქციიდან მეორეში გადადიან, სიტუაციას ერგებიან. არიან უფრო წესიერი ადამიანები და ნაკლებად წესიერები. შეიძლება არის ხალხი, ვისთანაც ჩვენ ვითანამშრომლებთ და არიან ისეთებიც, ვისთან თანამშრომლობასაც არ დავიწყებთ. ამ გადაწყვეტილებას ადგილობრივი ოფისი მიიღებს. აი, ეს ადამიანები, რომლებიც იბრძოდნენ და ყველას ძალიან კარგად იცნობენ, ეს ხალხი მიიღებს გადაწყვეტილებას. ისე, უბრალოდ, „ქართული ოცნების“ მანდატს ვერავინ მიიღებს“, - ამბობს გიორგი ჟვანია.

[შუშან შირინიანი, ახალქალაქი]