საპროტესტო აქციები ჯავახეთში

საკრებულოს შენობასთან „ქართული ოცნების“ დროშებითა და სხვადასხვა თემატიკის პლაკატებით, დაახლოებით 150-200 ადამიანი შეიკრიბა.
უმეტესი ნაწილი სოფლებიდან იყვნენ ჩამოსული. მომიტინგეები საქართველოს პრეზიდენტის მიხეილ სააკაშვილის გადაგომასა და ნინოწმინდისა და ახალქალაქის მუნიციპალიტეტების დეპუტატების „ერთიანი ნაციონალური მოძრაობიდან“ ენზელ მკოიანისა და სამველ პეტროსიანის, ასევე ახალქალაქის მუნიციპალიტეტის გამგეობისა და საკრებულოს თავმჯდომარეების ჰამლეტ მოვსისიანისა და ნაირი ირიციანის გადადგომას მოითხოვდნენ.

შეკრებილებს „ქართული ოცნების“ ათამდე წევრმა მიმართა. ისინი საუბრობდნენ ახალქალაქში არსებულ მდგომარეობაზე: სკოლების, საავადმყოფოების და ენობრივ პრობლემებზე, ასევე პოლიტიკაზე, რომელსაც უკვე ყოფილი ხელისუფლება „ნაციონალური მოძრაობა“ ეწევა.

შეკრებილებს ასევე მიმართა საქართველოს პარლამენტის დეპუტატმა გიორგი ჟვანიამ. მან აღნიშნა, რომ 2012 წლის ოქტომბერში სწორი არჩევანი გაკეთდა და დღეს ადამიანებმა ჯანსაღი საზოგადოების ფორმირებისთვის ყველაფერი უნდა იღონონ. ჟვანიამ დაამატა, რომ ბიძინა ივანიშვილი წინასაარჩევნო პერიოდში ხალხისთვის მიცემულ დაპირებებს თანდათანობით ასრულებს და ახალქალაქში ქართულ-სომხური უნივერსიტეტი აუცილებლად გაიხსნება. ამ ინფორმაციას შეკრებილები ხმამაღალი აპლოდისმენტებით შეხვდნენ.

„ქართული ოცნების“ რაიონული ორგანიზაციის ხელმძღვანელმა მელიქ რაისიანმა აღნიშნა, რომ დღეს ისინი საკრებულოსა და გამგეობის თავმჯდომარეების გადადგომას ცივილიზებული მეთოდით ითხოვენ და ამისთვის ერთ კვირას იძლევიან.
ახალქალაქში აქციის გამართვის შემდეგ მომიტინგეები ნინოწმინდაში გაემართნენ. მსგავსი აქცია გაიმართა დღეს ნინოწმინდაშიც.



[sknews.ge]