პრეზიდენტის შემდეგ ახალქალაქს სამი მინისტრი ესტუმრა

სასჯელაღსრულების, პრობაცისა და იურიდიული დახმარების მინისტრი სოზარ სუბარი, რეინტეგრაციის მინისტრი პაატა ზაქარეიშვილი და სპორტისა და ახალგაზრდობის საქმეთა მინისტრი ლევან ყიფიანი ახალქალაქს დღეს კრივის ფინალურ შეხვედრაზე დასასწრებად ესტუმრნენ.

მინისტრები თვითმმართველობის ადგილობრივი ორგანოების ხელმძღვანელთა თანხლებით ფინალს 13:30 საათზე შეუერთდნენ. მინისტრებს ახალქალაქის მუნიციპალიტეტის საკრებულოს თავმჯდომარე ჰამლეტ მოვსისიანი მასპინძლობდა. მათმა სტუმრობამ შეხვედრა დროებით შეაჩერა.
ფინალურ ბრძოლას მსოფლიოსა და ევროპის კრივის ჩემპიონები ისრაელ ჰაკობქიოხვიანი და გიორგი კანდელაკიც ესწრებოდნენ.

სტუმრები მხოლოდ რამდენიმე ბრძოლას დაესწრნენ, გამარჯვებული სპორტსმენები დააჯილდოვეს და ღონისძიება დატოვეს. მათ ახალქალაქის სპორტულ კომპლექსთან მდებარე აუზიც მოინახულეს.

მინისტრები დაესწრნენ მეორე სკოლაში გამართულ მოსწავლეთა ინტელექტუალურ თამაშს და დახურული შეხვედრა გამართეს „ქართული ოცნების“ აქტივისტებთან.

საპარლამენტო არჩევნების შემდგომ ეს ახალქალაქში მთავრობის წევრთა პირველი სტუმრობა არ არის. გარდა ამისა, ბოლო მოკლე პერიოდში ახალქალაქს ორჯერ სტუმრობდა საქართველოს პრეზიდენტი მიხეილ სააკაშვილიც. შეგახსენებთ, პრეზიდენტმა გუშინ, 18 აპრილს დაასრულა ორდღიანი ვიზიტი ჯავახეთში.

[შუშან შირინიანი, ახალქალაქი]