მიხეილ სააკაშვილი: ახალქალაქს დიდი მომავალი აქვს

მესამე სკოლაში პრეზიდენტი ისტორიის გაკვეთილს დაესწრო და მოზარდ თაობაში ისტორიის სწორად ცოდნის მნიშვნელობაზე ისაუბრა. შემდეგ სკოლის დირექტორი ლელა ჭინჭარაული ბრწყინვალების სახელმწიფო ორდენით დააჯილდოვა ქართული განათლების საქმეში შეტანილი დიდი წვლილისთვის.

წმინდა ზოსიმე კუმურდოელის სახელობის სასწავლებელ–პანსიონატში პანსიონატის აღსაზრდელებმა პრეზიდენტს თექით მოქსოვილი ქართული ანბანი უსახსოვრეს.

ადგილობრივებს პრეზიდენტმა სურბ ხაჩს ეკლესიიდან მიმართა.

„გუშინ ერთ ბიჭს ვკითხე, ვინ უნდა გამოვიდეს და მიპასუხა, პრინციპში მე არ ვიცი, რადგან ამ ქალაქში მომავალი არ არის. ჩემი აზრით, ამ ბიჭს არასწორი წარმოდგენა აქვს და ამ ქალაქს უზარმაზარი მომავალი აქვს, რადგან ჩვენ აქ უზარმაზარი რკინიგზა ავაშენეთ. ამ ბიჭსაც და ყველა ჩვენგანსაც წინ დიდი მომავალი გველოდება“, – განაცხადა მიხეილ სააკაშვილმა.

სურბ ხაჩის ეკლესიის ეზოში მიხეილ სააკაშვილმა 1915 წლის გენოციდის მსხვერპლთა მემორიალი ყვავილებით შეამკო.
ამის შემდეგ სომხეთის სამოციქულო ეკლესიის ეპარქიის წარმომადგენლობაში სომეხ სასულიერო მოღვაწეებთან ხანმოკლე და დახურული შეხვედრა გამართა.



[sknews.ge]