მიხეილ სააკაშვილი ახალქალაქს ესტუმრა

მიხეილ სააკაშვილი ახალქალაქში დაახლოებით 14:00 საათზე ჩავიდა. მისი ვიზიტი არაგვაში 14:00 საათზე იყო დაგეგმილი. თუმცა, პრეზიდენტმა მხოლოდ მშენებარე სარკინიგზო სადგურის ტერიტორია და ახალქალაქის მე–3 სკოლა მოინახულა, სადაც სასწავლო პროცესი ახალ შენობაში მიმდინარეობს.

საქართველოს პრეზიდენტის განცხადებით, მნიშვნელოვანია გაგრძელდეს ყველა ის პროექტი,რომელიც წინა მთავრობის პერიოდში რეგიონში მიმდინარეობდა, მათ შორის ბაქო-თბილისი-ყარსის რკინიგზის სადგურის მშენებლობა.

-”ჯავახეთში გვიჭირდა რაღაცეების დაწყება, იმიტომ, რომ ვიღაც რადიკალები, მოკრიმინალო ელემეტები არსებობდნენ. მოხდა მათი განეიტრალება. დავიწყეთ გზის მშენებლობა. რატომღაც წელს არ გაწმენდილა. წელს პირველი წელია, როცა ჯავახეთის ხალხი კარტოფილს ვერ აბარებს. წინა წლებში ხელოვნურად ვიბარებდით. სისულელეები კი არ უნდა ვილაპარაკოთ რეგიონული ქარტიის რატიფიკაციაზე, ეს გავწიოთ გვერდზე. იმისთვის, რომ აქ იყოს მშვიდობა, უნდა გაგრძელდეს პროექტები, უნდა გაგრძელდეს რკინიგზის მშენებლობა. უნდა გაიწმინდოს გზა. სკოლების ქსელი უნდა გავაძლიეროთ. მერე უკვე ვეღარავინ ვერ შექმნის პრობლემას”, - განაცხადა პრეზიდენტმა.

საქართველოს პრეზიდენტმა რეგიონში ქართული ენის სწავლების მნიშვნელობაზეც ისაუბრა.

”ჩვენი პასუხი რეგიონული ენის საკითხებზე მარტივია - საქართველოში წარმატებას უნდა მიაღწიო ქართული ენით, რა თქმა უნდა, ეს სხვა კულტურის ნიველირებას არ ნიშნავს. აქ სომხურსაც პრობლემები აქვს, გარუსების პროცესი მიდიოდა რუსეთის ჯარის ყოფნის დროს. ამ მოქალაქეების ინტეგრაცია ენის მეშვეობით უნდა მოვახდინოთ, და არა რეგიონული ქარტიებით და მოგონილი ამბებით”, - განაცხადა სააკაშვილმა.

მიხეილ სააკაშვილს არაგვას მოსახლეობაც ელოდებოდა. იგი ქართული ენის მასწავლებლის მაია გელაშვილის მონახულებას აპირებდა, რომელიც უკვე მეოთხე წელია სოფელში პროგრამის „ქართული – მეორე ენა“ ფარგლებში ასწავლის.

მაია გელაშვილის სახლში პრეზიდენტის მოლოდინში სკოლის მოსწავლეები შეიკრიბნენ. მაია გელაშვილმა არ იცის, პრეზიდენტი სწორედ მის მონახულებას რატომ აპირებდა.

”არ ვიცი, ალბათ რესურს ცენტრის რეკომენდაცია იყო. ჩვენ ქართულს მოსწავლეებს, მასწავლებლებს და ყველა სხვა მსურველს ვასწავლით. რამდენადაც ვიცი, პრეზიდენტი აქ ქართულის სწავლების მიმდინარეობის სანახავად ჩამოდის“, – ამბობს იგი.



[sknews.ge]