მოხალისეები თბილისიდან: იქამდე დავრჩებით, ვიდრე ბოლო კერა არ ჩაქრება [Photo]

20–კაციანი ჯგუფი სტიქიის ზონაში სამუშაოდ თბილისში მცხოვრებმა ბიზნესმენმა გიორგი რურუამ, სოციალური ქსელი დახმარებითშეკრიბა. ჯგუფში ყველა ასაკისა და სპეციალობის ადამიანია: სპორტსმენები, ფოტოგრაფები, ომის ვეტერანები. გიორგი რურუა ამბობს, რომ სამ–ოთხ კაციან ჯგუფებად გადანაწილდებიან და წაღვერში, იქ სადაც ახლა ხანძრის კერაა, მუშაობას დაიწყებენ. საჭირო იარაღები – ნიჩბები, მათ თავად ჩამოიტანეს თბილისიდან.

"ჩემთან ერთად არიან მეტნაკლებად გამოცდილებიც და ისინიც, ვისაც ხანძართან შეხება არ ჰქონია. ყველას გამოცდილება ვერ ექნება, იმიტომ, რომ მოხალისეები არიან. ვრცელდება ინფორმაცია, თითქოს აქ ბევრი მოხალისეა და ხალხი არ სჭირდებათ, მაგრამ ასე არ არის, აქ ცოტა ხალხია, ცეცხლის კერებს კი ჩაქრობა უნდა", – განაცხადა "სამხრეთის კარიბჭესთან" რურუამ.



ილია ჭკადუა ფოტოგრაფია, წაღვერში ისიც რურუას ჯგუფს ჩამოჰყვა.

"გვინდა იმ ადამიანებს დავეხმაროთ, ვინც აქ იბრძვიან თავსდატეხილი უბედურების წინააღმდეგ, რასაც ცეცხლი და სტიქია ჰქვია. მიწის მიყრა იქნება, "შლანგის" დაჭერა თუ წყლის მიწოდება, რაც შეგვეძლება იმით დავეხმარებით. ვფიქრობ, ჩვენ თვითონ ავიღებთ ინიციატივას რა მიმართულბით გავიფანტოთ. ალბათ შემდეგი დღეებიც აქ დავრჩებით", – ამბობს იგი.





[თამუნა უჩიძე, ნინო ნარიმანიშვილი, ბორჯომი]