დევიდ მორანი: ”ახალციხე და ნიუკასლი მეგობარი ქალაქები არიან”

ბრიტანეთის ელჩი და თვითმმართველობის წარმომადგენლები შეხვედრაზე, რომელიც ჟურნალისტებისთვის დახურული იყო, ერთი საათის განმავლობაში საუბრობდნენ. შეხვედრიდან გამოსვლის შემდეგ, როგორც დევიდ მორანმა განაცხადა, მისი სამცხე-ჯავახეთში სტუმრობის მიზანი რეგიონის გაცნობა იყო.

-’ადგილობრივი თვითმმართველობის პრიორიტეტებზე, სოფლის მეურნეობაზე, სპორტზე, განათლებაზე, ტურიზმზე ვისაუბრეთ’, - ამბობს მორანი.

მისი თქმით, სამომავლოდ ახალციხისა და ნიუკასლის დაძმობილების პროექტის შესახებაც ისაუბრეს.

-’ვისაუბრეთ იმაზე, თუ როგორ შეიძლება განვავითაროთ მომავალში ამ ორ ქალაქს შორის ურთიერთობა’, - აცხადებს მორანი.

ადგილობრივი თვითმმართველობის წევრებთან შეხვედრის შემდეგ ბრიტანეთის ელჩი და საელჩოს წარმომადგენლები ახალციხის ციხის დასათვარიელებლად გაემართნენ.

დევიდ მორანმა ახალციხის ციხეში მოქმედი ივანე ჯავახიშვილის სახელობის სამცხე-ჯავახეთის ისტორიის მუზეუმი და მეჩეთიც მოინახულა.

ციხის დათვალიერების შემდეგ მორანი სამცხე-ჯავახეთის სახელმწიფო სასწავლო უნივერსიტეტს ესტუმრა. სადაც უნივერსიტეტის სტუდენტებს და პროფესორ მასწავლებლებს შეხვდა.

შეგახსენებთ რომ დღეს დილით ახალციხეში ვიზიტი ელჩმა არასამთავრობო სექტორის წარმომადგენლებთან შეხვედრით დაიწყო.

ნუკა სტეფნაძე
თინათინ ზაზაძე