ბრიტანეთის ელჩი არასამთავრობო ორგანიზაციების მუშაობით დაინტერესდა

არასამთავრობო სექტორის თანამშრომლებმა ბრიტანეთის ელჩს ის მიმდინარე პროექტები გააცნეს, რომლებიც ამჟამად რეგიონში ხორციელდება.

-’ვისაუბრეთ ჩვენს მიერ გახორციელებულ პროგრამებზე და გავაცანით სამცხე-ჯავახეთში არსებული პრობლემები’, - ამბობს Mercy Corps-ის წარმომადგენელი ნინო ლომიძე.

დევიდ მორანის თქმით, ასეთი შეხვედრა მისთვის ძლიან მნიშვნელოვანი და საინტერესო იყო, რადგან იმ ორგანიზაციებისგან მოისმინა რეგიონის პრობლემების შესახებ, რომლებიც რიგი საკითხების მოგვარებაში უშუალოდ ჩართულნი არიან.

-’საკმაოდ მნიშვნელოვან საკითხებზე უწევთ რეგიონში მუშაობა და პრობლემების მოგვარება, მაგალითად როგორიცაა: ინტეგრაციის საკითხები, გენდერული თანასწორობა, სოფლის მეურნეობა და ბევრი სხვა მნიშვნელოვანი თემა’ - ამბობს ბრიტანეთის ელჩი საქართველოში დევიდ მორანი.

მორანის განმარტებით მთავრობის როლი მნიშვნელოვანია, მაგრამ არანაკლებ დიდ საქმეს აკეთებენ არასამთავრობო სექტორის წარმომადგენლებიც.

-’რა თაქმა უნდა მთავრობა ეხმარება ხალხს,მაგრამ ბევრია დამოკიდებული ხალხზე, ინდივიდებზე და ამ ორგანიზაციებზე, რომლებიც საზოგადოების პრობლემით არიან დაინტერესებული’, - ამბობს მორანი.

ელჩი არასამთავრობო სექტორის თანამშრომლებთან შეხვედრის შემდეგ ადგილობრივი თვითმმართველობის წარმომადგნლებს შეხვდა. შეხვედრა დახურულ კარს მიღმა მიმდინარეობდა. ამ წუთებში დევიდ მორანი ახალციხის ციხეს სტუმრობს. მოგვიანებით კი ახალციხის უნივერსიტეტს ეწვევა.

[ნუკა სტეფნაძე, ახალციხე]