ასპინძელებს ჰპირდებიან, რომ ზაფხულში უწყლობა აღარ შეაწუხებთ

დაბა ასპინძაში სასმელი წყლის სარეაბილიტაციო სამუშაოებს, რისთვისაც 1,800,000 ლარია გამოყოფილი, ტენდერში გამარჯვებული ფირმა ”აზერი” აწარმოებს.

დაბა ასპინძას სასმელი წყალი 15 კილომეტრის მოშორებით, ახალქალაქის სოფელ ხანდოდან უნდა მოეწოდოს. პროექტის თანახმად, შენდება 300მ3 ტევადობის რეზერვუარი, ეწყობა სათავე ნაგებობა და 15 კმ სიგრძის მილსადენი.

დაბა ასპინძის გარდა, სოფელ ხანდოდან მომარაგდება წყლით სოფლები: ნიჯგორი და აწყვიტაც.

თუმცა, დაგეგმილი მარტის ნაცვლად, სამუშაოები ივნისის ბოლოს დასრულდება.

”მაღალი ხარისხის წყლის მილები თურქეთიდან შემოგვაქვს. სამუშაოებს ერთდროულად რამდენიმე ადგილას ვაწარმოებთ და საბოლოოდ 24 ივნისისთვის დავასრულებთ”,- განმარტავს ფირმა ”აზერის” სამუშაოთა მწარმოებელი მურმან შეყელაშვილი.

სამუშაოებზე 35 ადგილობრივია დასაქმებული.

რატომ გაჭიანურდა პროექტის დასრულება და რატომ დაუგვიანდათ მუშებს ხელფასი, ”სამხრეთის კარიბჭე” თემაზე მუშაობს და დაწვრილებით ინფორმაციას მოგვიანებით მოგაწვდით.

[თინათინ ზაზაძე, ასპინძა]