პრეზიდენტმა კონსტიტუციის პროექტს ვეტო დაადო

გიორგი მარგველაშვილის განცხადებით მოტივირებული შენიშვნიდან პირველი ოთხი საკითხი არის მმართველი პარტიის საკითხები, რომლის ჩასწორების ვალდებულება "ქართულმა ოცნებამ" ვენეციის კომისიასთან აიღო.

"ეს ოთხი საკითხი უცვლელად გადმოდის მოტივირებულ შენიშვნებში. ეს არის ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები", – განაცხადა გიორგი მარგველაშვილმა

მისივე განმარტებით, მეხუთე საკითხიც ასევე "ქართულ ოცნებას" ეკუთვნის:"ეს ის საკითხებია, რომელზეც გესაუბრებოდით თუნდაც საკოსტიტუციო განხილვების დროს, როდესაც საშუალება მქონდა საქართველოს სხვადასხვა კუთხეში მესაუბრა კონსტიტუციის პროექტთან დაკავშირებით - ეს 2020 წელს პროპორციული არჩევნების დანიშვნის საკითხი".

ბოლო, მეექვსე საკითხი ეხება პრეზიდენტის არჩევის წესს. "ჩვენ ამ საკითხის მომავალში განხილვას ვთავაზობთ ქართულ პარლამენტს", - განაცხადა გიორგი მარგველაშვილმა.


საქართველოს პარლამენტმა კონსტიტუციური კანონის პროექტი მესამე მოსმენით 26 სექტემბერს, 117 ხმით მიიღო.

[sknews.ge]