გამოკითხულთა 62%-ს გადაწყვეტილი არ აქვს ვის მისცემს ხმას – NDI

გადაწყვეტილება მხოლოდ 35%-ს აქვს მიღებული, 3% ამბობს, რომ არ იცის 1%-მა პასუხზე უარი განაცხადა.

ამავე კვლევის მიხედვით, გადაუწყვეტელ ამომრჩევლებში 18-35 წლამდე ასაკის ახალგაზრდები ჭარბობენ, – 68%, ყველაზე ნაკლები გადაუწყვეტელებში და ყველაზე მეტი გადაწყვეტილ ამომრჩევლებში 56+ ასაკის ამომრჩეველია. ამ ასაკის 39%–ს გადაწყვეტილი აქვს მის მისცემს ხმას, გადაუწყვეტელი კი 57%–ია.



თუ მონაცემებს დასახლებების მიხედვით გავაანალიზებთ, ყველაზე მეტი გადაუწყვეტელი ამომრჩეველი უმცირესობათა დასახლებებშია – 69%, ასევე მაღალია ისეთი პატარა ქალაქების მაჩვენებელი, როგორიც ახალციხეა – 64%, და სოფლად ეს მაჩვენებელი 60%–ია. გადაწყვეტილი ამომრჩევლების რაოდენობა ყველაზე მაღალი თბილისშია – 39%.



გამოკითხულთა 57% ამბობს, რომ სავარაუდოდ, ადგილობრივი თვითმმართველობის არჩევნებზე მივა, 43% კი ამბობს, რომ სავარაუდოდ არ მივა. მათგან, ვინც არჩევნებში მონაწილეობას აპირებს, 47%–მა იცის ვის მისცემს ხმას, 50%–ს კი ჯერ გადაწყვეტილი არ აქვს.



ხოლო მათგან, ვინც არჩევნებში მონაწილეობას არ აპირებს, ვის მისცემდა ხმას არჩევნებზე რომ მისულიყო, მხოლოდ 19%–მა იცის, 77% კი ამბობს, რომ ჯერ გადაწყვეტილი არ აქვს.



საზოგადოებრივი აზრის კვლევა, ეროვნულ დემოკრატიული ინსტიტუტის (NDI) დაკვეთით, CRRC-საქართველომ დიდი ბრიტანეთის მთავრობის, UK aid-ის დაფინანსებით ჩაატარა. კვლევის საველე სამუშაოები 18 ივნისი -9 ივლისის პერიოდში მიმდინარეობდა საქართველოს მასშტაბით (ოკუპირებული ტერიტორიების გარდა). პირისპირ ინტერვიუს სახით, წარმომადგენლობითი შერჩევით 2 261 პირი გამოიკითხა. კვლევაში საშუალო ცდომილების ზღვარი არის +/- 2.2%.

საზოგადოებრივი აზრის კვლევის შედეგების მეორე ნაწილი დღეს, 27 ივლისს, გამოქვეყნდა.

[ნინო ნარიმანიშვილი, ახალციხე]