2018 წელს პირდაპირი არჩევნების გზით არჩეულ პრეზიდენტს 6–წლიანი ვადა ექნება

ერთჯერადად, 6-წლიანი ვადის შემოღება კონსტიტუციის ახალი რედაქციის გარდამავალ დებულებებში აისახება.

„მიღებული დოკუმენტის თანმახმად მომავალ წელს საპრეზიდენტო არჩევნები ტარდება პირდაპირი წესით. ეს არის ეს არის ასახული კოსტიტუციაში, ახალ დოკუმენტში, რაც შეეხება უფლებამოსილების ვადას, ერთჯერადად ჩვენ დავთანხმდოთ შემოთავაზებას, რომ 6–წლიანი იყოს მომდევნო არჩევნებით არჩეული პრეზიდენტი. ეს უკავშირდება პროპორციულ სისტემაზე გადასვლას“, – განაცხადა საქართველოს პარლამენტის თავმჯდომარემ ირაკლი კობახიძემ.

მისივე თქმით, მას შემდეგ, რაც პროპორციულ საარჩევნო სისტემაზე გადავალთ:“ პოლიტიკურადაც უფრო მეტად იქნება დაბალანსებული საარჩევნო კოლეგია“.

როგორც პარლამენტის რიგგარეშე სხდომაზე ითქვა, ვენეციის კომისია პრეზიდენტის არაპირდაპირი წესით არჩევას იმ პირობებში მიესალმება, როცა პარლამენტი სრულად პროპორციული სისტემით იქნება არჩეული. ამასთან, გამომდინარე იქიდან, რომ პროპორციული საარჩევნო სისტემის ამოქმედება 2020 წლის საპარლამენტო არჩევნებისთვის არ ხდება და ის 2024 წლიდან შედის ძალაში, ხოლო პრეზიდენტის არჩევნები 2023 წლისათვის უნდა ჩატარდეს, გასათვალისწინებელია ვადის ერთი წლით გახანგრძლივება 2018 წელს არჩეული პრეზიდენტისთვის.

შეგახსენებთ, რომ პარლამენტმა კონსტიტუციური კანონპროექტები მეორე მოსმენით, გუშინ 23 ივნისს მიიღო.
წყარო:interpressnews.ge