დღეიდან “ბორჯომი” ალუმინის ქილებითაც გამოვა

მინერალური წყლების ბრენდმა „ბორჯომის“ წარმოება, ახალი შეფუთვით, ალუმინის ქილებში დაიწყო. „IDS ბორჯომი საქართველოში“ ამბობენ, რომ ახალი ხაზი სრულად პასუხობს თანამედროვე სტანდარტებს და აღჭურვილია ტექნოლოგიური სიახლეებით. კომპანიამ ინოვაცია 5 მილიონიანი რეინვესტიციის საფუძველზე დანერგა.

ახალი ხაზის გაშვებას დღეს N1 ჩამოსხმელ ქარხანაში ეკონომიკისა და მდგრადი განვითარების მინისტრი გიორგი გახარია დაესწრო და „ბორჯომი“ ახალ შეფუთვაში დააგემოვნა კიდეც.

„კომპანია ბორჯომი ქმნის სტანდარტს საერთაშორისო ბაზარზე მინერალური წყლის მარკეტინგის მიმართულებით. ახალ ქილებში ჩამოსხმა არის ინოვაციური და მარკეტინგული. დარწმუნებული ვარ იგი, როგორც კომპანიის წარმატებას, ისე ქართულ ექსპორტს შეუწყობს ხელს,“ – განაცხადა გიორგი გახარიამ.

„ბორჯომის“ ჩამოსასხმელი ქარხანა სტუმრებს, თავად კომპანია „IDS ბორჯომი საქართველოს“ გენერალურმა დირექტორმა ზაზა კიკვაძემ დაათვალიერებინა.

„ბრენდი ამ შეფუთვით ახალ მიზნობრივ აუდიტორიაზე გადის, რომლის ასაკობრივი სეგმენტი 20 – 30 წელია. ასევე, უფრო მრავალფეროვანი ხდება „ბორჯომის“ მოხმარების სიტუაციებიც. ეს ძალიან მნიშვნელოვანი პროექტია ჩვენთვის. ამით ახალი სტანდარტები დამკვიდრდება, როგორც საქართველოში, ისე საექსპორტო მასშტაბით, სადაც ბორჯომია წარმოდგენილი“, –ამბობს ნზაზა კიკვაძე.

კომპანიაში ამბობენ, რომ მინერალური წყლის ბრენდი „ბორჯომი“ არასტანდარტული და ექსკლუზიური შეფუთვით, 0.33 ლიტრიანი ე.წ. „სლიქ“ ალუმინის ქილით იწარმოება და იგი გაყიდვაში ივლისიდან გამოჩნდება.

მინერალური წყალი „ბორჯომი“ ვულკანური წარმოშობის უნიკალური წყალია. „ბორჯომის“ მწარმოებელი კომპანია IDS ბორჯომი საქართველო საერთაშორისო კომპანია IDS Borjomi International-ის შემადგენელი ნაწილია. ბაზარზე კომპანიის პროდუქცია წარმოდგენილია მინერალური წყლის შემდეგი ბრენდებით: „ბორჯომი“, „ლიკანი“ და „ბაკურიანი“. საქვეყნოდ ცნობილი ბრენდით „ბორჯომი“ კომპანია დღესდღეობით მსოფლიოს 30-მდე ქვეყანაში გადის ექსპორტზე.




[ლუბა გიორგაძე, ბორჯომი]