'ბორჯომი' ახალი შეფუთვით – ალუმინის ქილებითაც გამოვა

„IDS ბორჯომი საქართველოს“ ინფორმაციით, ახალი ხაზი სრულად პასუხობს თანამედროვე სტანდარტებს და აღჭურვილია ტექნოლოგიური სიახლეებით. კომპანიამ ინოვაცია 5 მილიონიანი რეინვესტიციის საფუძველზე დანერგა. ახალ ხაზზე მინერალური წყლის ბრენდის „ბოჯრომის“ ახალი შეფუთვის ალუმინის ქილის „ბორჯომის“ წარმოება განხორციელდება. პირველი, სასიგნალო პარტია სწორედ ხვალ ჩამოისხება.

"მინერალური წყლის ბრენდი „ბორჯომი“ არასტანდარტული და ექსკლუზიური შეფუთვით, 0.33 ლიტრიანი ე.წ. „სლიქ“ ალუმინის ქილა, გაყიდვაში მალე გამოჩნდება. ბრენდი ამ შეფუთვით ახალ მიზნობრივ აუდიტორიაზე გადის, რომლის ასაკობრივი სეგმენტია 20 – 30 წელია. ასევე, უფრო მრავალფეროვანი ხდება „ბორჯომის“ მოხმარების სიტუაციებიც", – აცხადებენ კომპანიაში.

მინერალური წყალი „ბორჯომი“ ვულკანური წარმოშობის უნიკალური წყალია. „ბორჯომის“ მწარმოებელი კომპანია IDS ბორჯომი საქართველო საერთაშორისო კომპანია IDS Borjomi International-ის შემადგენელი ნაწილია.

ბაზარზე კომპანიის პროდუქცია წარმოდგენილია მინერალური წყლის შემდეგი ბრენდებით: „ბორჯომი“, „ლიკანი“ და „ბაკურიანი“. საქვეყნოდ ცნობილი ბრენდით „ბორჯომი“ კომპანია დღესდღეობით მსოფლიოს 30-მდე ქვეყანაში გადის ექსპორტზე.

[sknews.ge]