„ბორჯომი“ რუსეთის ბაზარზე დაბრუნებას გეგმავს

- ”2012 წლის 19 ნოემბერს კომპანია “IDS Borjomi International” - მა ოფიციალური წერილით მიმართა „როსპოტრებნადზორის“ ხელმძღვანელს გენადი ონიშენკოს, სადაც სთხოვს მას დაუბრუნდეს მინერალური წყლის „ბროჯომის“ რუსეთის ბაზარზე რეგისტრაციის საკითხის განხილვას და ასევე, დაგეგმოს რუსი ექსპერტების საქართველოში ვიზიტი, რომლის ფარგლებშიც უნდა მოხდეს ქარხნების ინსპექტირება”, - ნათქვამია განცხადებაში.

„ბორჯომის“ რუსეთის ბაზარზე დაბრუნების საკითხი დღის წესრიგში 2011 წელსაც იდგა. მოლაპარაკებების შედეგად, რომელიც გენადი ონიშენკოსა და „IDS Borjomi International“-ის გენერალურ დირექტორს ვლადიმერ აშუროვს შორის გაიმართა, მწარმოებელ კომპანიას გარკვეული ფორმალური მოთხოვნების შესრულება დაევალა.

2012 წლის 17 თებერვალს IDS Borjomi Iternational-მა „როსპოტრებნადზორს“ ყველა მოთხოვნილი დოკუმენტი გადაუგზავნა, რის შემდეგაც უწყებამ ოფიციალურად მიიღო კომპანიის განაცხადი მინერალური წყლის რეგისტრაციის მოთხოვნაზე.

გენადი ონიშენკოს განცხადების მიხედვით, კომპანიებმა, რომლებმაც თავის დროზე გააკეთეს განაცხადი „როსპოტრებნადზორში“ და რომელი კომპანიების დოკუმენტაციამაც გაიარა საჭირო შემოწმება, უნდა მიიღონ რუსი ექსპერტები წარმოების ადგილზე, საწარმოების ინსპექტირების მიზნით.

- “IDS Borjomi International” - ი მზადაა ყველანაირად გაუწიოს დახმარება რუს ექსპერტებს, რათა მათ ხელი არ შეეშალოთ საწარმოების ინსპექტირების საქმეში“ - აცხადებს ვლადიმირ აშუროვი, “IDS Borjomi International”-ის გენერალური დირექტორი”, - ნათქვამია კომპანიის ოფიციალურ განცხადებაში.

საერთაშორისო კომპანია “IDS Borjomi International” -ი ნატურალური მინერალური წყლის უმსხვილესი მწარმოებელია დსთ - სა და ბალტიის ქვეყნების მინერალური წყლის ბაზარზე. “IDS Borjomi International” აერთიანებს შემდეგ კომპანიებს: IDS Borjomi Georgia, IDS Group Ukraine, IDS Borjomi Russia, IDS Borjomi Azerbaijan, IDS Borjomi Belarus, IDS Borjomi Europe.

IDS Borjomi International -ი აწარმოებს ისეთი მინერალური წყლის ბრენდებს, როგორიცაა: „ბორჯომი“, „ლიკანი“, „მირგოროდსკაია“, „მორშინსკაია“, „ტრისკავეცკაია აქვა - ეკო“, „ტრუსკავეცკაია კრისტალნაია“, „სვიტოი ისტოჩნიკ“, „ედელვეისი“ და სხვა.

[ნინო ნარიმანიშვილი, ბორჯომი]