გოდერძის გზის მშენებლობა ადიგენში 11 ადგილობრივის ნაკვეთს ეხება

ბათუმი – ახალციხის საავტომობილო გზის ხულო–ზარზმის მონაკვეთის მშენებლობა 11 ადგილობრივის ნაკვეთს ეხება. ამის შესახებ „სამხრეთის კარიბჭესთან“ გამგებლის წარმომადგენელი ზარზმის ტერიტორიულ ორგანოში გურამ გავაშელი აცხადებს.

გოდერძის გზის პროექტი მუნიციპალიტეტში მხოლოდ სამ დასახლებას – ზარზმას, მლაშესა და უტყისუბანს ეხება. ვიდრე ამ დასახლებებში აზომვითი სამუშაოები ჩატარდებოდა, კომპენსაციის მიმღებად 7 ოჯახი ითვლებოდა.

„ახლა რომ გაზომეს ტრასა, 4 ადგილობრივის ნაკვეთი დაემატა. ოთხივე მათგანი მლაშეში ცხოვრობს და მათი ფართობები „ძინძეს“ ტერიტორიაზეა. აქ სულ სათიბებია“, – ამბობს გავაშელი და ამატებს, რომ ტრასის ფართობთან ერთად სოფელში ადგილობრივების ნაკვეთებიც აიზომა – „ზუსტად დადგინდა საზღვრები, ახლა ამ საზღვრების საჯარო რეესტრში დამოწმებას ცდილობენ“.

მისი თქმით, იმ 11 ოჯახიდან, ვისაც კომპენსაცია ეკუთვნის, შესაძლოა ერთმა მიღება ვერ შეძლოს: „მიწის მიღება–ჩაბარების აქტი არ აქვს და გაფორმება უჭირს“.

ამ დრომდე გზის სამშენებლო სამუშაოები ადიგენის მუნიციპალიტეტის ტერიტორიაზე არ დაწყებულა.
„აქ მხოლოდ ზარზმასთან, მდინარე ძინძეზე ხიდი გააკეთეს ჯერ“, – ამბობს გავაშელი.

შეგახსენებთ, რომ ბათუმი – ახალციხის საავტომობილო გზის ხულო–ზარზმის მონაკვეთის რეაბილიტაცია მიმდინარე წელს უნდა დაიწყოს. მშენებლობას არაბეთის ეკონომიკური განვითარების ქუვეითის ფონდი აფინანსებს. პირველ ეტაპზე ხულოდან გედერძის უღელტეხილამდე მისასვლელი გზა გაკეთდება. აქ 29 კილომეტრის მოწყობა იგულისხმება.

[თამუნა უჩიძე, ადიგენი]