შალვა გოგოლაძე: ‘პირველ სკოლასთან რკინის ფერმა დაიდგა’

აღნიშნულის შესახებ დღეს, 2 ივნისს, საკრებულოს სხდომაზე, დამოუკიდებელმა დეპუტატმა შალვა გოგოლაძემ ისაუბრა. მისი თქმით, რკინის კონსტრუქცია, რომელიც სკოლასთან დგას , როგორც სკოლის, ასევე ქალაქის იერსახეს ამახინჯებს.

„თუ გაგივლიათ ამ ადგილზე (N1 საჯარო სკოლასთან ს.კ) უცნაური კონსტრქცია, რკინის ფერმა დაიდგა, მიუღებელია, ქალაქის იერსახეს ამახინჯებს. ვისაც მიუწვდება ხელი, დავუძახოთ და ამ საკითხზე ვისმჯელოთ“, – განაცხადა საკრებულოს სხდომაზე შალვა გოგოლაძემ.

გოგოლაძეს დეპუტეტების ნაწილიც დაეთანხმა, მათი განმარტებით, წყლის ავზი სკოლის უკანა მხარეს უნდა დაემონტაჟებინათ, ან მიწაში ჩაედოთ.

სკოლის დირექტორის ჟუჟუნა გოგოლაურის განმარტებით, ამ თემაზე არაერთხელ იმსჯელეს თუმცა სხვა გზა არ ჰქონდთ, რადგან სკოლის უკანა მხარეს, მიქუტიშვილის ქუჩაზე მჭიდრო დასახლებაა.

„კონსტრუქცია არის 15–ტონიანი, ავზში ჩადის 10 ტონა წყალი, რომ აეწიათ ეს სიმაღლეზე, „ამწეკრანი“ ვერ მიუდგებოდა. სადღაც ხომ უნდა დადგმულიყო, ამიტომ შეირჩა ეს ადგილი. ჩვენ მივმართეთ ქალაქის მერიას და მათთან ერთად შეირჩა ეს ადგილი. არაფერს ხელს არ უშლის, დგას ტირიფის ხესთან, ეს არის წინ წამოწეული თემა, რომ უბრალოდ ილაპარაკონ“, – განაცხადა სატელეფონო საუბარში ჟუჟუნა გოგოლაურმა.

ის რომ ალტერნატიული ფართის არარსებობის გამო, იძულებლები გახდნენ იქ დაედგათ ავზი, სადაც ახლა დგას, ამაზე ახალციხის მერი ვლადიმერ ზედგინიძეც საუბრობს. მისი თქმით, მოლაპარაკებები ჰქონდათ განათლების სამინისტროთანაც და დამპროექტებლებთანაც: „გულსატკენია ნამდვილად ამ კონსტრუქციის შენობის წინ განთავსება, მაგრამ ესეც დიდი დავის შემდგომ მიღწეულ იქნა, რომ გადატანილ იქნა იმ ადგილზე, სადაც ახლა დგას. დამპროექტებლები ჩამოვიყვანეთ ორჯერ. თავიდან სკოლის შენობის წინ,დაღუპული მეომრების მემორიალთან იდგმებოდა, ჩვენ შევძელით, რომ უფრო მოფარებულ ადგილზე გადაგვეტანა“.

მისივე თქმით, ეს კონსტრუქცია სკოლის გათბობისთვის არის გათვალიწინებული.მისი საშუალებით სკოლას წყლის დებეტი მიეწოდება.

[თინათინ ზაზაძე, ახალციხე]