ტურისტული ქალაქის ტუალეტს წყალი განრიგით აქვს

ახალციხის ცენტრალურ პარკში მდებარე ეს საპირფარეშო თითქმის ერთადერთია ქალაქში, რომლითაც მოქალაქეებს სარგებლობა შეუძლიათ. (თუ არ ჩავთვლით ქალაქის ბოლოში, ავტოსადგურში მდებარე ტუალეტს, რომლითაც მგზავრები სარგებლობენ და ძველი ბაზრის მიმდებარედ არსებულ საპირფარეშოს, გარე მოვაჭრეებისთვის). თუმცა, დროის უმეტესი ნაწილი ეს საპირფარეშო დაკეტილია.

ლაურა იაროშევსკი, რომელიც ამ საპირფარეშოს უვლის, ამბობს, რომ წყლის პრობლემა აქვს, – „წყალი განრიგით მოდის, დილით 2 საათი და საღამოსაც 2 საათით. ‘წყალკანალშიც’ ვიყავი და ვიცი, რომ წყლის პრობლემები რომ იყო ქალაქში, მაგის გამოა აქაც ასე“.

უწყლო ტუალეტში ღია მხოლოდ ერთი ნაწილია, რომლის დასალაგებლად ლაურა წყალს ბოთლებით ეზიდება.

„ხშირად ტაქსით, სახლიდან მოაქვს წყლით სავსე ბოთლები“, – გვეუბნება გვერდზე მდებარე ბარის მეპატრონე მარი ალავიძე.

ტუალეტი ფასიანია, შესვლა 20 თეთრია. ლაურა ამბობს, რომ ამ ფულით დასალაგებელ საშუალებებს ყიდულობს, – “ტილოა საჭირო, ფხვნილი, ამავე დროს ტაქსით რომ ვზიდავ წყალს, 8 ლარი მაგაშიც მჭირდება“.

„წყალმომარაგების კომპანიის“ სამცხე ჯავახეთის რეგიონული ფილიალის მენეჯერი ბორის სპანდერაშვილი ამბობს, რომ ქალაქის ცენტრში მდებარე ერთადერთ საზოგადოებრივ საპირფარეშოს წყალს მალე მიაწვდიან: „გაშვებული მყავს ხალხი, რომ შეამოწმონ“.

ახალციხის ცენტრალურ პარკში მდებარე სამგანყოფილებიანი საპირფარეშო (ქალების, კაცების, შშმ პირებისთვის) 2012 წელს აშენდა, მაშინ როდესაც პარკს რეაბილიტაცია უტარდებოდა.

ამ, ქალაქისთვის აუცილებელი ობიექტის შესახებ, "სამხრეთის კარიბჭე" ადრეც ხშირად წერდა.




[მარიამ ბარძიმაძე, ახალციხე]