თოჯინების თეატრში სეზონი ერთი თვის დაგვიანებით გაიხსნება

თოჯინების თეატრის ადმინიტრაცია „ახალციხის ციხიდან“ ძველ ადგილზე დასაბრუნებლად ემზადება. ინვენტარის ნაწილი ქალაქის ცენტრში, პაატა ნათენაძის ქუჩაზე მდებარე რეაბილიტირებულ შენობაში, უკვე გადატანილია, თუმცა სეზონის განხსნა ამ დრომდე ვერ ხერხდება. თეატრის დირექტორის რუსუდან სისაურის განმარტებით, მიზეზი ისაა, რომ სცენის მოსაწყობად გამოცხადებული ტენდერი სამჯერ ჩაიშალა.

„როგორც იქნა გამოვლინდა ტენედრში გამარჯვებული კომპანია, რომელიც 94 000 ლარად სცენას მოაწყობს, გააკეთებს კულისებს და ფარდებს.

გარდა ამისა „რაბათში“ სცენის მონტაჟს განახორცელებს და ახალ შენობაში ააწყობს“, – ამბობს ახალციხის თოჯინების თეატრის ხელმძღვანელი რუსუდან სისაური.

მისივე თქმით, მიუხედავად იმისა, რომ შენობის მოწყობას ოქტომბრამდე ვერ ასწრებენ, თუ მოთხოვნა იქნება, პექტაკლებს სკოლებსა და ბაღებში მაინც გამართავენ.

„თუ გამოჩნდება მსურველი ჩვენ შეგვიძლია გასვლითი სპექტაკლები გავმართოთ“, – ამბობს რუსუდან სისაური.

გარდა აღნიშნულისა, თეატრის ადმინისტრაციაში შიშობენ, რომ რეაბილიტირებულ და გაფართოებულ შენობაში ის პერსონალი, რომელიც ამჟამად ჰყავთ, საკმარისი აღარ იქნება. ამიტომ თანამშრომლების დამატების მიზნით რუსუდან სისაურმა კულტურის სამინისტროს მისწერა.

„ამხელა შენობას ერთი დამლაგებელი არ ეყოფა. არ გვყავს კონტროლიორი, სცენის მუშები და ა.შ. ახლა 20 თანამშრომელი ვართ და კიდევ 10–ის დამატებაა საჭირო. ჩვენ მივწერეთ სამინისტროს და რას გადაწყვეტენ არ ვიცით“, – განმარტავს რუსუდან სისაური.

შეგახსენებთ, რომ 2012 წელს თოჯინების თეატრი რეაბილიტირებულ "ახალციხის ციხეში" გადავიდა. ციხის ტერიტორაზე გადასვლიდან მალევე არასაკმარისი ფართის გამო თეატრის ხელმძღვანელობა უკან ქალაქში დაბრუნებას ითხოვდა.

[თნათინ ზაზაძე, ახალციხე]