ანტიდასავლურ კამპანია – ტრენინგი და დისკუსია ახალციხეში

ტრენინგს, რომელიც ახალციხის დემოკრატიული ჩართულობის ცენტრში გაიმართა, სამცხე–ჯავახეთის სახელმწიფო უნივერსიტეტის სტუდენტები ესწრებოდნენ. ახალგაზრდებს ასოციაცია „ტოლერანტის“ წარმომადგენელი თამარ აბრამიშვილი ესაუბრა.

„რუსეთი ძალიან ბევრ მეთოდს იყენებს ანტიდასავლური პროპაგანდისთვის, მათ შორისაა არასამთავრობო ორგანიზაციები. მაგალითად, ასეთია ევრაზიის ინსტიტუტი, რომელსაც, როგორც გაირკვა, კრემლი აფინანსებს. ეს ორგანიზაცია მკვეთრად ანტიდასავლური რიტორიკით გამოირჩევა“, – ამბობს თამარ აბრამიშვილი.

სემინარზე საზოგადოებრივი აზრის ბოლო კვლევების მონაცემებიც აჩვენეს – როგორ იცვლება წლიდან წლამდე ევროკავშირისადმი პოზიტიურად განწყობილ მოქალაქეთა რაოდენობა. ამ მონაცემების მიხედვით, თუ 2013 წელს, გამოკითხულთა 85 % მიიჩნევდა, რომ საქართველო უნდა გამხდარიყო ევროკავშირის წევრი ქვეყანა, 2016 წელს ეს მაჩვენებელი 69%–ია. ტრენერმა ეს ცვლილება სწორედ ანტიდასავლურ პროპაგანდას დაუკავშირა.

„ხშირად არის დეზინფორმაცია, – მოსაზრებები იმაზე, რომ ევროპა ეს არის ქართველობის დაკარგვა, რომ ევროპა ცუდია და თუ ჩვენ მისი ნაწილი გავხდებით, ამით დავკარგავთ ქართველობას, ღირებულებებს. ესაა სიცრუე და ყველა ადამიანს აქვს უფლება, რომ მიიღოს სწორი ინფორმაცია“,– ამბობს სტუდენტი ხატია ნატრიაშვილი.

ტრენინგი და დისკუსია ახალციხეში, დაახლოებით ერთ საათს გაგრძელდა. ტრენინგი გაიმართა კამპანიის "სამოქალაქო ორგანიზაციები ევროპული საქართველოსთვის" ფარგლებში, რომელიც 8 მაისს, სამოქალაქო საზოგადოების რეგიონული ქსელის (R-CSN) წევრმა ორგანიზაციებმა, ევროატლანტიკური ინტეგრაციის მხარდამჭერის მიზნით დაიწყეს. კამპანია საქართველოს 10 რეგიონში ტარდება და მასში რეგიონებში მცხოვრები სკოლის მოსწავლეები და სტუდენტები მიიღებენ მონაწილეობას.

სამცხე–ჯავახეთში ტრენინგი უკვე ჩაუტარდათ ახალქალაქში, სოფელ ჩუნჩხის მოსწავლეებს. ხვალ კი შეხვედრა აბასთუმნის საჯარო სკოლის მოსწავლეებისთვის გაიმართება.

სამოქალაქო საზოგადოების ქსელი რეგიონებში მომუშავე 60–მდე ორგანიზაციას აერთიანებს. ქსელის ფასილიტაციას ახორციელებს არასამთავრობო ორგანიზაცია "სიდა“.




[მარიამ ბარძიმაძე, ახალციხე]