ქალი ამომრჩევლების პრიორიტეტების გამოსავლენად კამპანია დაიწყო

ქალებს სამცხე–ჯავახეთში, ორ მუნიციპალიტეტში ახალციხესა და ნინოწმინდაში გამოიკითხავენ.

არასამთავრობო ორგანიზაციების, „ახალციხის ახალგაზრდული ცენტრისა“ და „დემოკრატ მესხთა კავშირის“ წარმომადგენლებმა დღეს, 27 სექტემბერს გამოკითხვა ახალციხიდან დაიწყეს. ეს ორგანიზაციები, სამოქალაქო საზოგადოების რეგიონული ქსელი (R-CSN), წარმომადგენლები არიან.

მის მიზანს, საარჩევნო დღის წესრიგში ქალი ამომრჩევლების პრიორიტეტების გამოვლენა წარმოადგენს. როგორც ორგანიზატორები ამბობენ, შედეგების პრეზენტაცია მოგვიანებით პოლიტიკური პარტიებისთვის და კანდიდატებისთვის გაიმართება, რომლებიც თავის მხრივ, უკეთ გაეცნობიან ამომრჩეველი მოსახლეობის უმრავლესობის საჭიროებებს და შესთავაზებენ მათი გადაჭრის გზებს.

გამოკითხვის შედეგების პრეზენტაციის შემდეგ, სამოქალაქო საზოგადოების რეგიონული ქსელი დააკვირდება თუ რამდენად აისახება კანდიდატებისა და პარტიების პროგრამებში წარდგენილი შედეგები და რამდენად იქნება გათვალისწინებული ქალი ამომრჩევლების პრიორიტეტები.

სამოქალაქო საზოგადოების რეგიონული ქსელი (R-CSN) წინასაარჩევნოდ გამოკითხვას, 29 სექტემბერის ჩათვლით 10 რეგიონში ჩაატარებს.

საქართველოს მოსახლეობის უმრავლესობა (52%) ქალია, თუმცა კვლევები აჩვენებს, რომ ქალების მონაწილეობა თვითმართველობის არჩევნებში დაბალია და 2014 წლის არჩევნებში მხოლოდ 40% შეადგინა. არჩევნებში ქალების მონაწილეობის გაზრდის მიზნით, მნიშვნელოვანია, რომ საარჩევნო სუბიექტებმა იცოდნენ მათი პრიორიტეტები და საჭიროებები, რომლებიც საქართველოში რეგისტრირებული ამომრჩევლის უმრავლესობას შეადგენენ.

კამპანია ხორციელდება სამოქალაქო საზოგადოების რეგიონული ქსელის (R-CSN) მიერ, რომლის ფასილიტაციას ახორციელებს არასამთავერობო ორგანიზაცია “სიდა”. R-CSN საქმიანობის ფინანსურ მხარდაჭერას ახორციელებენ აღმოსავლეთ-დასავლეთის მართვის ინსტიტუტის ACCESS პროგრამა და ევროკავშირი.

"სამოქალაქო საზოგადოების რეგიონული ქსელი (R-CSN)“ არის საქართველოს სხვადასხვა რეგიონში მოქმედი სამოქალაქო ორგანიზაციებისა და აქტიური მოქალაქეების არაფორმალური გაერთიანება. ქსელი შეიქმნა 2012 წელს „სიდას“ ფასილიტაციით და მასში გაერთიანებულია 64 რეგიონული ორგანიზაცია.






[sknews.ge]