ვახუშტი მენაბდე: სახელმწიფომ მალე უნდა მოახდინოს "ენის ქარტიის" რატიფიცირება

„ქარტია ამბობს, რომ უმცირესობათა ენის სტატუსი ეკუთვნის იმ ენებს, რომელიც ტრადიციულად გამოიყენება სახელმწიფოს შესაბამის ტერიტორიაზე ამ სახელმწიფოს მოქალაქეების მიერ, რომლებიც რიცხობრივად უფრო პატარა ჯგუფს წარმოადგენენ, ვიდრე ამ სახელმწიფოს დანარჩენი მოსახლეობა; და განსხვავდებიან სახელმწიფოს ოფიციალური ენისგან (ენებისგან). ამ გასაზღვრებას სრულად აკმაყოფილებენ ეთნიკურად სომეხი საქართველოს მოქალაქეები, რომლებიც სამცხე-ჯავახეთის რეგიონში ცხოვრობენ. სახელმწიფომ რაც შეიძლება მალე უნდა მოახდინოს დოკუმენტის რატიფიცირება და შეიმუშავოს სამოქმედო გეგმა მისი სწორი იმპლემენტაციისთვის“, - ამბობს ვახუშტი მენაბდე.

მისივე განმარტებით, ქარტია შეიცავს არაერთ ვალდებულებას მონაწილე სახელმწიფოებისთვის განახორციელონ მთელი რიგი ღონისძებები რეგიონალური და უმცირესობათა ენების ხელშესაწყობად: „ეს ღონისძიებები ეხება ასეთი ენის სტატუსის მინიჭებას, განათლების სისტემას, სასამართლო და ადმინისტრაციულ წარმოებას, მედიას და სხვა“.

რაც შეეხება საფრთხეს, რომელსაც შესაძლოა შეიცავდეს ქარტიის რატიფიკაცია, მენაბდე ამბობს, რომ ქარტია არავითარ საფრთხეებს არ შეიცავს: „თუმცა შესაძლოა ზოგისთვის ასე იყოს. გაჭიანურებას რაც შეეხება, სავარაუდოდ, სახელმწიფო არ იყო მზად იმ ვალდებულებების შესასრულებლად, რაც ქარტიით მას დაეკისრებოდა, ამიტომაც თავს არიდებდა პირდაპირი ვალდებულებების აღებას“.

[ნინო ნარიმანიშვილი, ახალციხე]