თისელში დარბაზული ეკლესიის რეაბილიტაცია იგეგმება

თისელის დარბაზული ეკლესიის რეაბილიტაციის (I ეტაპი) საპროექტო–სახარჯთაღრიცხვო დოკუმენტაციის მომზადებისთვის 40 000 ლარია გათვალიწინებული.

საქართველოს კულტურული მემკვიდრეობის დაცვის ეროვნული სააგენტოს მიმდინარე წლის 15 მარტს მიერ გამოცხადებულ ტენდერში შპს „ქართულმა მემკვიდრეობამ“ გაიმარჯვა.

სატენდერო დოკუმენტაციის მიხედვით ჩასატარებელია შემდეგი სამუშაოები:

• ძეგლის შესახებ საარქივო მასალების მოძიება (ბიბილიოგრაფია, ფოტოდოკუმენტაცია, არსებული ანაზომები, პროექტი);
• კომპლექსური არქეოლოგიური დაზვერვის წარმოება თანამედროვე ტექნოლოგიების გამოყენებით, საკვლევი ობიექტის მიმდებარე ტერიტორიაზე:
- მაღალი რეზოლუციის აერო გამოსახულების და რელიეფის ციფრული მოდელის გამოყენებით (ფოტოგრამმეტრიული აერო ფოტო გადაღება).
- არსებული აერო და კოსმოსური გამოსახულებების, ტოპომასალის დეშიფრირება,
- საველე დაზვერვა,მნიშვნელოვანი დეტალების მარკირება და დახარისხება,სავარაუდო არქეოლოგიური ობიექტების იდენტიფიცირება და GPS კოორდინატების აღება.
• ძეგლის ერთიანი 3D მოდელის აგება და მაღალი გარჩევადობის ფოტოგრამმეტრიული ფიქსაცია;
• გამოყენებული სამშენებლო მასალის გეოლოგიური დახასიათება და იდენტიფიკაცია;
• ჩამოცვენილი არქიტექტურული დეტალებისა და პერანგის ქვის ლოკაციის დადგენ;ა
• მნიშვნელოვანი დეტალების მარკირება;
• ძეგლის არსებული მდგომარეობის კვლევა, კედლების ენოდოსკოპიური და გეოფიზიკური კვლევა, დაზიანების ხარისხის შესწავლა და ძეგლის ერთიან 3D მოდელზე დატანა;
• ძეგლზე საჭირო ჩარევის დოზის დადგენა და მოცულობითი რეკონსტრუქციის მოდელის აგება
• სააღრიცხვო ბარათის შედგენა;
• ძეგლის რეაბილიტაციისათვის ერთიანი კონცეფციის შედგენა.

თისელის ღვთისმშობლის სახელობის ეკლესია, რომელიც სავარაუდოდ XIV-XV საუკუნეებშია აგებული, დაზიანებულია, ჩამოშლილია ტაძრისა და მინაშენის გადახურვა, ჩამონგრეულია ნართექსის კამარაც. უშუალოდ ტაძრის ძირითადი კორპუსის კამარა შემორჩენილია, თუმცა გადახურვის უქონლობის გამო მასზე მცენარეული საფარია გაჩენილი, რაც მძიმე მდგომარეობაში მყოფ ნაგებობას კიდევ უფრო აზიანებს.
სავალალო მდგომარეობაშია მოხატულობაც. გადახურვის არარსებობიდან გამომდინარე, მხატვრობაზე ატმოსფერული ნალექები ზემოქმედებს, ეს კი მის მდგომარეობას კიდევ უფრო ამძიმებს.

მოცემული ტენდერით გათვალისწინებულია თისელის ღვთისმშობლის სახელობის ეკლესიის არსებული მდგომარეობის ციფრული კონსერვაცია (ვირტუალური სამგანზმომილებიანი მოდელი და დეტალური ფოტოტექსტურა) და რეაბილიტაციის წინასაპროექტო დოკუმენტაცია.

საპროექტო დოკუმენტაციის მიწოდების საბოლოო ვადაა 2017 წლის 31 ოქტომბერი.

[sknews.ge]