დეკანოზი გიორგი მამალაძე სასამართლომ წინასწარ პატიმრობაში დატოვა

დეკანოზ მამალაძის ადვოკატები წინასწარი პატიმრობიდან მათი დაცვის ქვეშ მყოფის გათავისუფლების სანაცვლოდ 20 ათასი ლარის გირაოს ითხოვდნენ, თუმცა მოსამართლე არსენ კალატოზიშვილმა მათი შუამდგომლობა არ დააკმაყოფილა.

იმ მოტივით, რომ არსებობს მოწმეებზე ზეწოლის საფრთხე, მოსამართლემ სრულად გაიზიარა პროკურატურის შუამდგომლობა, ბრალდებულისთვის შეფარდებული აღკვეთი ღონისძიების ძალაში დატოვების შესახებ.

შეგახსენებთ, საპატრიარქოს ქონების მართვის სამსახურის ყოფილი ხელმძღვანელი და საპატრიარქოს წმინდა იოაკიმესა და ანას სახელობის სამედიცინო ცენტრის ასევე ყოფილი დირექტორი, მამა გიორგი მამალაძე, საქართველოს პროკურატურამ 10 თებერვალს დააკავა. მთავარი პროკურატურის განცხადებით, გამოძიება 2 თებერვალს ერთ-ერთი მოქალაქის განცხადების საფუძველზე დაიწყო, რომელმაც საქართველოს პროკურატურას მიმართა და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების - ციანიდის მოძიებაში დახმარება, რომლის გამოყენებითაც ამ უკანასკნელს, უნდა მოეხდინა მაღალი იერარქიის სასულიერო პირის სიცოცხლის ხელყოფა.

[sknews.ge]