პრეზიდენტი მამალაძის დაკავებაზე: ველოდები გამოძიების დასრულებას, რომელიც პასუხს გასცემს კითხვებს

აღნიშნულთან დაკავშირებით გიორგი მარგველაშვილი განცხადებას ავრცელებს, რომელშიც განმარტავს, რომ პრეზიდენტის ადმინისტრაცია აქტიურ კომუნიკაციაშია პროკურატურასთან.

"შეშფოთებული ვარ მთავარი პროკურატურის მიერ დღეს გავრცელებული ინფორმაციით, რომლის მიხედვითაც იგეგმებოდა საქართველოს მართლმადიდებელი ეკლესიის მაღალი იერარქიის სასულიერო პირის სიცოცხლის ხელყოფა.

ჩვენ აქტიურ კომუნიკაციაში ვართ პროკურატურასთან, ვაკვირდებით გამოძიების პროცესს, სახელმწიფოს ინტერესებიდან გამომდინარე ველოდებით გამოძიების დროულად დასრულებას, რომელიც გასცემს პასუხს კითხვებს, როგორც დაგეგმილი დანაშაულის შესაძლო მონაწილეების, ასევე შემკვეთების თაობაზე", – ნათქვამია პრეზიდენტის განცხადებაში.

შეგახსენებთ, საქარველოს მთავრი პროკურორის ინფორმაციით, დეკანოზი გიორგი მამალაძე, 10 თებერვალს, მკვლელობის მომზადების ბრალდებით დააკავეს. პროკურატურაში დღეს ამ თემააზე საგანგებო ბრიფინგი გაიმართა, რომელზეც პროკურორმა ირაკლი შოთაძემ განმარტა, რომ საქმეზე გამოძიება 2017 წლის 2 თებერვალს ერთ-ერთი მოქალაქის განცხადების საფუძველზე დაიწყო. უწყების ცნობით, ამ მოქალაქემ პროკურატურას აცნობა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების - ციანიდის მოძიებაში დახმარება, რაც მაღალი იერარქიის სასულიერო პირის სიცოცხლის ხელყოფისთვის სჭირდებოდა.

12 თებერვალს საქართველოს პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით პატიმრობა შეეფარდა. მთავარი პროკურატურა რამდენიმე ვერსიაზე მუშაობს.

დღესვე, განცხადება გაავრცელა საქართველოს პრემიერ–მინისტრმა გიორგი კვირიკაშვილმა. პრემიერის თქმით, დეკანოზ გიორგი მამალაძის საქმე პირად კონტროლზე ჰყავს აყვანილი. ასევე, აპირებს გერმანიაში მიუნხენის უსაფრთხოების კონფერენციაზე დაგეგმილზე ადრე გაემგზავროს და პირადად მოინახულოს პატრიარქი, რომელსაც დღეს დილით, ბერლინის კლინიკაში, ოპერაცია ჩაუტარდა.

"გამომდინარე შექმნილი არაორდინარული ვითარებიდან, ბერლინში გავაგზავნე ჩემი პირადი დაცვის წევრები, დაცვის სპეციალური სამსახურის უფროსთან ერთად, რათა ადგილზე გაძლიერებული ყოფილიყო უსაფრთხოების ზომები. ძალიან მნიშვნელოვანია გამოძიების პროფესიონალურად წარმართვა და ბოლომდე მიყვანა. მთავარია, რომ ექიმების განცხადებით, ოპერაციამ კარგად ჩაიარა და პატრიარქი თავს კარგად გრძნობს. მთელი გულით ვუსურვებ მას მალე გამოჯანმრთელებას, დიდხანს სიცოცხლეს ჩვენი ხალხისა და ქვეყნის საკეთილდღეოდ“, - აცხადებს გიორგი კვირიკაშვილი.

მისივე შეფასებით, აღკვეთილია ჩვენი ქვეყნის წინააღმდეგ დაგეგმილი დანაშაული - ეკლესიის წინააღმდეგ ვერაგული თავდასხმა, რისთვისაც ის სამართალდამცველ სტრუქტურებს მადლობას უხდის.

[ნინო ნარიმანიშვილი, ახალციხე]