დეკანოზ გიორგი მამალაძეს დღეს დაკითხავენ

დეკანოზი გიორგი მამალაძე დაკითხვას რამდენიმე დღეა ითხოვს.

24 თებერვალს გამომძიებლები მას ექსპერტიზისთვის საჭირო ნიმუშები აუღეს, რის შემდეგაც უნდა დაწყებულიყო მამა გიორგის დაკითხვა, თუმცა როგორც გამომძიებლებმა განმარტეს, დროის სიმცირის გამო 24 თებერვალს დეკანოზი აღარ დაუკითხავთ. 24 თებერვალს ჩატარებული საგამოძიებო მოქმედებებისგან განსხვავებით, დღევანდელ პროცედურებს პროკურორების სხვა ჯგუფი, პროკურატურის საგამოძიებო ნაწილის უფროსის მოადგილის ჯარჯი წიკლაურის ხელმძღვანელობით ატარებს.

დეკანოზის ინტერესების დამცველები აცხადებენ, რომ ჩვენების შემდეგ გამოძიება სხვა მიმართულებით წავა. კერძოდ, ადვოკატი ამბობს, რომ მამა გიორგი მამალაძე ისაუბრებს იმის შესახებაც, თუ როგორ და საიდან მოხვდა მის ნივთებში იარაღი, რომელიც სამართალდამცველებმა მისი სახლიდან ამოიღეს.

შეგახსენებთ, საქართველოს პროკურატურის ინფორმაციით, 10 თებერვალს დეკანოზი გიორგი მამალაძე მკვლელობის მომზადების ბრალდებით დააკავეს. მთავარი პროკურატურის განცხადებით, გამოძიება 2 თებერვალს ერთ-ერთი მოქალაქის განცხადების საფუძველზე დაიწყო, რომელმაც საქართველოს პროკურატურას მიმართა და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების - ციანიდის მოძიებაში დახმარება, რომლის გამოყენებითაც ამ უკანასკნელს, უნდა მოეხდინა მაღალი იერარქიის სასულიერო პირის სიცოცხლის ხელყოფა.

[sknews.ge]