ახალციხეში დიაგნოსტიკური ცენტრი გაიხსნა

დიაგნოსტიკურ ცენტრში გინეკოლოგი, მამოლოგი, ენდოკრინოლოგი, თერაპევტი, კარდიოლოგი, ნევროპათოლოგი, დერმატოლოგი და პედიატრი იმუშავებს.

ცენტრში შესაძლებელი იქნება: ქალთა კონსულტაცია, ექოსკოპია (ვაგინალური კარდიოექოსკოპია), მამოგრაფია, კოლპოსკოპია (საშვილოსნოს ყელის მოწვა), დენსიტრომეტრია (ამ გამოკვლევით შესაძლებელია ოსტეოპოროზის ადრეულ სტადიაში გამოვლენა) და დოპლეროგრაფია ქვედა კიდურების ვენებისა და არტერიების გამოკვლევა).

ცენტრი ახალციხეში, დემოკრატ ქალთა საზოგადობის ბაზაზე გაიხსნა.

გახსნის ცერემონიას ამერიკის საელჩოს წარმომადგენლები, ასევე, იაპონიის საგანგებო და სრულუფლებიანი ელჩი საქართველოში ტოშიო კაიტანი და ადგილობრივი ხელისუფლების პირველი პირები ესწრებოდნენ.

დიაგნოსტიკური ცენტრი „ვიტა მედი“ იაპონიის საელჩოს ფინანსური მხარდაჭერით გარემონტდა და ახალი აპარატურით აღიჭურვა.

„საქართველოში ონკოლოგიური დაავადებების რისკი დიდია, ამიტომ ცენტრის ფუნქციონირება მნიშვნელოვანია“, – განაცხადა გახსნისას ტოშიო კაიტანმა.

სამცხე–ჯავახეთის დემოკრატ ქალთა საზოგადოების ხელმძღვანელის მარინა მოდებაძის განმარტებით, დიაგნოსტიკური ცენტრი ძალადობის მსხვერპლ ქალებს უფასოდ მოემსახურება. გარდა ამისა, გამოკვლევების ნაწილი უფასო იქნება 40 წელს ზემოთ ასაკის ქალებისთვისაც.

„ჩვენ უკვე ჩავერთეთ სხვადსხვა სადაზღვევო პროგრამაში და ამ ფორმითაც გავუწევთ კონსულტაციებს“, – განაცხადა მარინა მოდებაძემ.

ცენტრი ახალციხეში, კოსტავას ქუჩაზე, N109–ში მდებარეობს. ცენტრი კვირის გარდა ყოველდღე, 10:00–დან 17:00 საათამდე იმუშავებს. მსურველებს შეუძლიათ წინასწარ ჩაწერა – ტელ.: 22 13 87; 571 22 25 10.







[ლუბა გიორგაძე, ახალციხე]