სესხების გალარების პროგრამა დღეს სრულდება

სესხების გალარების პროგრამა დღეს, 17 მარტს სრულდება. როგორც „საქართველოს ბანკების ასოციაციაში“ განმარტავენ მოსახლეობის აქტივობა განსაკუთრებით ბოლო დღეებში დიდი იყო, თუმცა გალარების პროგრამით რამდენმა ისარგებლა, ამაზე ასოციაციაში ჯერ ვერ საუბრობენ.

„ბოლო დღეების განმავლობაში დიდი აქტივობა იყო. ამიტომ სჯობს დაველოდოთ პროგრამის დასრულებას და მონაცემებსა და შედეგებზე შემდეგ ვისაუბროთ“, - აცხადებს „საქართველოს ბანკების ასოციაციის“ აღმასრულებელი დირექტორი გიორგი ცუცქირიძე.

გალარების სოციალური პროგრამა, რომელიც საქართველოს მთავრობისა და ეროვნული ბანკის ერთობლივი პროგრამაა, 2017 წლის 17 იანვარს დაიწყო და 2 თვის განმავლობაში მიმდინარეობდა. აღნიშნული პროგრამით სუბსიდირებას ექვემდებარება 2015 წლის პირველ იანვრამდე ფიზიკური პირების ან ინდმეწარმეების მიერ აშშ დოლარში აღებული და უძრავი ქონებით უზრუნველყოფილი სესხები. პროგრამაში მონაწილეობა ნებაყოფლობითია.

[sknews.ge]