დღეიდან სესხების 'გალარების ერთჯერადი აქცია იწყება

ეროვნული ბანკის გათვლით, დაახლოებით, 27 ათას პირს შეეძლება 2015 წლამდე დოლარში აღებული სესხის ლარში კონვერტაცია მოახდინოს. მთავრობა შეღავათიანი კურსით სესხების გალარების ხარჯების სუბსიდირებას უზრუნველყოფს.

ეროვნული ბანკის ვიცე-პრეზდინტის, არჩილ მესტვირიშვილის, ინფორმაციით, სუბსიდია არ შეეხება მაღალი შემოსავლების მქონე პირებს, ანუ ვისი წლიური შემოსავალი 2015 წელს 100,000 ლარზე მეტი იყო ან ვისი სესხის ნარჩენი ოდენობა100 ათას დოლარს აღემატება.

სესხების გალარება მოხდება შემდეგი პრინციპით: იმ დღეს არსებულ ოფიციალურ გაცვლით კურსს გამოკლებული 20 თეთრი. მაგალითად, თუ აშშ დოლარის მიმართ ოფიციალური გაცვლითი კურსი არის 2.7 ლარი, მაშინ სესხის გალარება მოხდება 2.5 კურსით. კურსთაშორის სხვაობა დაფინანსდება სახელმწიფო ბიუჯეტიდან, ამისთვის კი დაგეგმილია ბიუჯეტიდან 65 მლნ ლარი გამოიყოს.

ეროვნული ბანკის ვიცე-პრეზიდენტის განცხადებით, კომერციულ ბანკებს ექნებათ ვალდებულება აქციის თაობაზე კლიენტს შეატყობინონ: „ჩვენ მივცემთ მითითებას კომერციულ ბანკებს 5 სამუშაო დღის განმავლობაში მოკლე ტექსტური შეტყობინებით ან სხვა რაიმე გზით შეეხმიანონ და აცნობონ იმ პირებს , ვისაც ეს აქცია პოტენციურად შეეხებათ“, – აცხადებს არჩილ მესტვირიშვილი.

საბანკო სესხების გალარება ერთჯერადი სოციალური პროგრამაა და მიზნად ისახავს, დაეხმაროს საზოგადოების იმ ნაწილს, რომელსაც უძრავი ქონებით უზრუნველყოფით, უცხოური ვალუტით აღებული აქვთ სესხი 2015 წლის 1-ელ იანვრამდე.

[sknews.ge]