24 წლის ახალგაზრდის მკვლელობაში ბრალდებულს 9–წლიანი პატიმრობა მიესაჯა

სათხა–ნინოწმინდის გზაზე მომხდარი მკვლელობის საქმეზე, ახალციხის რაიონულ სასამართლოსში ბოლო სხდომა, დღეს 14 მარტს გაიმართა.
9 თვიანი სასამართლო განხილვების შემდეგ, დღევანდელ სხდომაზე, პროკურორსა და ადვოკატს დრო რეპლიკებისთვის დაეთმოთ.

პროკურორის მამუკა ქომოშვილის მტკიცებით, არმენ მარკარიანმა, 24 წლის ახალგაზრდა განზრახ მოკლა. ამიტომ, იგი სასამართლოს განაჩენით კმაყოფილია: „ჩვენი ყველა მტკიცებულებულება მარკარიანის წინააღმდეგ, ფაქტობრივად, გაითვალისწინა მოსამართლემ“.

მსჯავრდებულის ადვოკატი, რეზო კაჭკაჭიშვილი ამბობს, რომ ისი დაცვის ქვეშ მყოფი თავს იცავდა და ახალგაზრდა დანით შემთხვევით შემოკვდა. ამ მოტივით, დაცვის მხარე გამამართლებელ გადაწყვეტილებას ელოდა.

„ვფიქრობ, რომ დაუსაბუთებელი გადაწყვეტილება გამოიტანა მოსამართლემ და მხოლოდ პროკურორის წარდგენილი მტკიცებულებები გაითვალისწინა. მე დღეს მარკარიანის გათავისუფლებას ველოდი“, – ამბობს რეზო კაჭკაჭიშვილი და ამატებს, რომ რაიონული სასამართლოს გადაწყვეტილებას, კანონით დადგენილ ვადებში, სააპელაციო სასამართლოში გაასაჩივრებს.

სასამართლო სხდომას დღეს მსჯავრდებულის ახლობლები არ დასწრებიან. დარბაზში მხოლოდ გარდაცვლილი, 24 წლის ახალგაზრდის ნათესავები იმყოფებოდნენ, რომლებიც მოსამართლე ჯეირანაშვილის მიერ გამოტანილი გადაწყვეტილებით უკმაყოფილოები დარჩნენ.
„24 წლის ბიჭი მომიკლეს და 9 წელი მიუსაჯეს, ეს სამართალია?!“ – გვითხრა გარდაცვლილის ბებიამ სიგუშ სანოსიანმა.

შეგახსენებთ, რომ ნინოწმინდაში მკვლელობა 2016 წლის 6 ივლისს მოხდა. ორი ახალგაზრდის ურთიერთშელაპარაკება, სისხლიან დაპირისპირებაში გადაიზარდა რის შედეგადაც ერთერთი მათგანი გარდაიცვალა. საქმეზე გამოძიება, სსკ-ს 108-ე მუხლით მიმდინარეობდა.



[ლუბა გიორგაძე, ახალციხე]