ცოლის მკვლელობაში ბრალდებულს 17–წლიანი პატიმრობა მიუსაჯეს

ახალციხის რაიონულ სასამართლოში სხდომა დღეს, 11 ოქტომბერს, 14:00 საათზე დაიწყო. მას შემდეგ, რაც მხარეებმა დასკვნითი სიტყვები და რეპლიკები თქვეს, მოსამართლე მარიკა ჩიტაშვილი განაჩენის გამოსატანად გავიდა.

ერთსაათიანი თათბირის შემდეგ, მოსამართლემ ბრალდებული დამნაშავედ ცნო. მოსამართლის გადაწყვეტილებით, მ.ზ–ს 17 წლით პატიმრობა შეეფარდა, მისთვის სასჯელის ვადისათვლა დაკავების დღიდან, 2017 წლის 9 აპრილიდან დაიწყო.

დასკვნითი სიტყვის ნაწილში, მსჯავრდებულის ადვოკატმა, იმ ეპიზოდში, სადაც ბრალდება მ.ზ–ს 64 წლის მამაკაცის ნაჯახით მკვლელობის მცდელობას ედავებოდა, გადაკვალიფიცირება და მუხლის, ჯანმრთელობის განზრახ დაზიანებით შეცვლა მოითხოვა. მოსამართლემ შუამდგომლობა არ დააკმაყოფილა, მიზეზად კი დაზარალებულის ჩვენება და ამ ჩვენების უდაოდ ცნობა დაასახელა. საუბარია ჩვენებაზე, რომელშიც ნ.ზ აცხადებს, რომ მსჯავრდებული მოკვლას უპირებდა და ნაჯახს ურტყამდა.

მსჯავრდებულის ადვოკატი ირმა ენდელაძე მოსამართლის გადაწყვეტილებას მკვლელობის ნაწილში ეთანხმება, თუმცა მკვლელობის მცდელობის ნაწილში სადაც, მოსამართლემ მუხლი არ გადააკვალიფიცირა, არ ეთანხმება და გადაწყვეტილების გასაჩივრებას აპირებს.

დღეს, სასამართლო სხდომას, მხოლოდ მსჯავრდებულის მამა ესწრებოდა.

„მოსამართლის გადაწყვეტილება უსამართლოდ მიმაჩნია, მეგონა მეტი შეღავათები იქნებოდა“, – გვითხრა პროცესის დასრულების შემდეგ მ.ზ–ს მამამ.

განაჩენთან დაკავშირებით კომენტარი არ გაუკეთებია საქმის პროკურორს მამუკა ქომოშვილს.

შეგახსენებთ, რომ დაბა ასპინძაში მკვლელობა მიმდინარე წლის 8 აპრილს მოხდა. ქმარმა 27 წლის ცოლს დანით რამდენიმე სასიკვდილო ჭრილობა მიაყენა. გარდაცვლილს ორი მცირეწლოვანი, – 3 და 6 წლის შვილი დარჩა.

[ლუბა გიორგაძე, ასპინძა]