გასვლითი გაკვეთილები სკოლის მოსწავლეებისთვის

დღეს, 7 მარტს, „ახალციხის ციხეზე“ მეცხრე კლასის მოსწავლეებს გასვლითი გაკვეთილი ჩაუტარდათ თემაზე: საქართველოს ისტორია და სამცხე–ჯავახეთი; მოსწავლეებმა, რომლებიც ოთხი საჯარო სკოლიდან იყვნენ წარმოდგენილი, ციხესთან ერთად სამცხე–ჯავახეთის ისტორიული მუზეუმიც დაათვალიერს. გიდმა მათ აქ წარმოდგენილი ექსპონატები და მათ ისტორია გააცნო.

განათლების სამინისტროს პროგრამის განხორციელება, რომელიც მოსწავლეებისთვის გასვლითი გაკვეთილების ჩატარებას გულისხმობს, დღეს დაიწყო. მას ორგანიზაებაში სამინისტროს ახალციხის საგანმანათლებლო რესურსცენტრი, სამცხე–ჯავახეთის სამხარეო ადმინისტრაცია, ახალციხის მერია, ახალციხის მუნიციპალიტეტის გამგეობა და ციხის ადმინისტრაცია ეხმარება.

,,ღონისძიება თვის ბოლომდე გაგრძელდება“, – ამბობს ახალციხის საგანმანათლებლო რესურსცენტრის დირექტორი ხათუნა ხმალაძე.
პროგრამის მიზანი, ამა თუ იმ მიმართულებით მოსწავლეებისთვის ცოდნის გაღრმავებაა.

,,საკმაოდ საინტერესო ინფორმაცია მივიღეთ ჩვენც და მოსწავლეებმაც. ბავშვები ძალიან ინტერესით ეკიდებოდნენ ახალ ინფორმაციებს, დასვეს კითხვები. დაინტერესდნენ ანტიკური პერიოდის იარაღებით და სხვა კულტურებით“, – ამბობს ახალციხის მეექვსე სკოლის პედაგოგი გია გაჩეჩილაძე.

განათლების სამინისტროს პროგრამაში ჩართულია ქალაქ ახალციხის მუნიციპალიტეტის 38 საჯარო და ერთი კერძო სკოლის მეცხრე კლასის 471 მოსწავლე, ასევე 46 ისტორიის მასწავლებელი.

პროგრამის დასასრულს თითოეულ სკოლაში მოეწყობა კონფერენცია თემაზე: ,,საქართველოს ისტორია და მესხეთ–ჯავახეთი“.

[ მარიამ ბარძიმაძე, ახალციხე ]