ახალციხეში, მეეზოვეებს იანვრის ხელფასის ნაწილი არ აუღიათ

ახალციხეში შპს „კეთილმოწყობის“ თანამშრომლები აცხადებენ, რომ მათ იანვარში ნამუშევარი ხელფასის ნაწილი არ მიუღიათ.
„გვითხრეს ახალი ხელშეკრულებები გავაფორმეთ და ამ პროცედურების გამო ნაწილი დროულად ვერ მიიღეთო, არ ვიცით საერთოდ მოგვცემენ თუ არა“–გვეუბნება ერთ–ერთი მეეზოვე.

შპს „კეთილმოწყობის“ სამსახურის უფროსის გიორგი ლონდარიძის განცხადებით, ხელფასის დაგვიანების მიზეზი წლის დასაწყისში გამოცხადებული ტენდერი და ხელშეკრულებების დადებასთან დაკავშირებული პროცედურებია.

„ქალაქის კეთილომოწყობისათვის, იანვრის დასაწყისში მერიამ, ჯერ ტენდერი გამოცხადა, შემდეგ კი თანამშრომლებთან ხელახალი ხელშეკრულებები დაიდო. ეს პროცედურები 18 იანვარს დასრულდა, რის გამოცა მხოლოდ 13 დღეში გამომუშავებული ხელფასი მიიღეს“, – გვიხსნის გიროგი ლონდარიძე და ამატებს, რომ აღნიშნული მხოლოდ „კეთილმოწყობის“ სამსახურში დასაქმებულ 40–მდე მეეზოვეს შეეხო.

ქალაქის კეთილმოწყობისათვის, მერია ტენდერს ყოველი წლის დასაწყისში აცხადებს და თანამშრომლებთან ახალ ხელშეკრულებებს აფორმებს.
„ტექნიკური პროცედურები იყო გასავლელი, რის გამოც, კეთილმოწყობის თანამშრომლებმა ხელფასის ნაწილი ვერ მიიღეს. თუმცა, შპს „კეთილმოწყობას“ დავალიანების გასასტუმრებლად თანხა უკვე გადავურიცხეთ“, – აცხადებენ ახალციხის მერიაში.

[ლუბა გიორგაძე, ახალციხე]