ნიკა მელია: სამცხე–ჯავახეთი ძირითადი დასაყრდენი იქნება

„ერთიანი ნაციონალური მოძრაობის“ ლიდერი და პოლიტსაბჭოს წევრი ნიკა მელია აცხადებს, რომ სამცხე–ჯავახეთში მათი მხარდამჭერების დიდ ნაწილს პარტია არ დაუტოვებია: „მაგალითად, ასპინძაში 95 პროცენტი ისევ ნაციონალურ მოძრაობაშია“.

მელია უახლოეს ერთ თვეში რეგიონს ესტუმრება და რაიონულ ორგანიზაციებსაც დააკომლექტებს: „პირადად ჩამოვალ, შევხვდები ყველას, ჩავატარებთ კონფერენციებს და ყველა ორგანიზაციის ხელმძღვანელს განვსაზღვრავთ. ასე იქნება მესხეთშიც და ჯავახეთშიც. 20 რაიონულ ორგანიზაციაში ჩავატარებთ არჩევნებს და დავიწყებთ ფუნქციონირებას“.

მისი თქმით, აპრილიდან პარტია წინასაარჩევნო მარათონსაც აქტიურად დაიწყებს. ხოლო რაც შეეხება არჩევნებამდე საკრებულოებში მათ ფრაქციებს, ამბობს, რომ ძირითად შემადგენლობას ყველგან ინარჩუნებენ: „278 დეპუტატი ჰყავს „ნაციონალურ მოძრაობას“ და მხოლოდ 34–მა დატოვა პარტია. არ ვფიქრობ, რომ ამით პარტია დასუსტდა, პირიქით, გაძლიერდა“.

შეკითხვაზე, გაყოფს თუ არა მოახლოებული თვითმმართველობის არჩევნებისთვის რეგიონში ამომრჩევლების ხმებს პარტიის გახლეჩვა, მელია შეკითხვითვე გვპასუხობს: „რატომ უნდა ვიმარჩიელოთ? „ნაციონალური მოძრაობა“ მზარდი პოლიტიკური პარტიაა და დარწმუნებული ვარ რომ სამცხე–ჯავახეთი „ნაციონალებისთვის“ ერთ–ერთი ძირითადი დასაყრდენი იქნება. მაშინ როცა ბურჯანაძე წავიდა, ის იმდენად რეიტინგული პოლიტიკოსი იყო, რომ ახლა პარტიიდან წასული ვერცერთი პოლიტიკოსი ვერ შეედრება, მაგრამ რა, ამან პარტია შეასუსტა?! რა თქმა უნდა არა. ასევე წავიდა ირაკლი ოქრუაშვილიც, მაგრამ ამას პარტიისთვის ზიანი არ მიუყენებია“.

შეკითხვაზე, რამდენად განსაზღვრავს მხარდამჭერების ოდენობას ის, თუ ვის მხარეს იქნება ვანო მერაბიშვილი, მელია გვპასუხობს: „ასე საკითხის დასმა 10 ათასობით ამომრჩევლის შეუარაცხყოფაა. ხალხი ვანოს და მიშას გამო არ აძლევდა პარიტას ხმას. უკეთესი მომავლის რწმენით ირჩევდნენ ამ პარტიას. ვანო თავად გააკეთებს განცხადებას“.

[თამუნა უჩიძე, ახალციხე]