ახალგაზრდები ნაგვის გადამამუშავებელი საწარმოს საჭიროებას ხედავენ

დღეს, 27 იანვარს ახალციხის დემოკრატიული ჩართულობის ცენტრში საინფორმაციო სახის შეხვედრა გაიმართა თემაზე-„გარემოს დაბინძურება და მისი შედეგები“.

ახალციხის პირველი და მეექვსე საჯარო სკოლების მოსწავლეებს ახალციხის ზრდასრულთა განათლების ცენტრის ხელმძღვანელი თამუნა კაპანაძე ესაუბრა.

შეხვედრაზე ახალგაზრდები განიხილავდნენ სხვადასხვა გზებს, გარემოს ზიანის შესამცირებლად. მათი აზრით, ერთ–ერთი გზაა მყარი ნარჩენების გადამამუშავებელი საწარმოს ფუნქციონირება. ახალგაზრდები საუბრობდნენ მოქალაქეების როლსა და პასუხისმგებლობებზეც.

„ძალიან მარტივი საქმეა, რომ ავიღოთ ნარჩენები და ჩავყაროთ ნაგვის ურნაში. ძალიან კარგი იქნება, თუ ჩვენს ირგვლივ ტერიტორია ხშირად დავასუფთავებთ და ამის გაკეთებისაკენ სხვებსაც მოვუწოდებთ“, -ამბობს, შეხვედრის მონაწილე თათია ბერძენიძე.

შეხვედრის დასასრულს, ახალციხის დემოკრატიული ჩართულობის ცენტრში თემაზე მომზადებული ვიდეო აჩვენეს.

„შეხვედრა გვქონდა ბავშვებთან, რომლებიც თავიან სკოლებში გარემოს თემაზე მუშაობენ და ამ კუთხით ღონისძიებებს აწყობენ. მათგანაც წამოვიდა იდეები, თუ რა პროექტები განვახორციელოთ ამ კუთხით. სამომავლოდ, გავაგრძელებთ თანამშრომლობას“, - ამბობს თამუნა კაპანაძე.

[ლუბა გიორგაძე, ახალციხე]