სოფიო შამანიდი მოხეს სკოლაში მიმდინარე მოვლენებზე

სოფიო შამანიდი მოხეს სკოლას დღეს, 27 დეკემბერს, აქციებიდან მეორე დღეს სტუმრობდა. იგი შეხვდა მოსწავლეებსა და სკოლის ადმნისტრაციას.

შეხვედრების დასრულების შემდეგ, სოფიო შამანიდმა "სამხრეთის კარიბჭესთან" განაცხადა, რომ მან შეისწავლა მოხეს სკოლაში არსებული ვითარება და ინფორმაციას საქართველოს პრეზიდენტს გიორგი მარგველაშვილს გადასცემს: "მოვუწოდე მოსწავლეებს, რომ საკლასო ოთახებში შესულიყვნენ. დირექტორმა განაცხადა, და მეც დარწმუნებული ვარ, რომ ამის შემდეგ მსგავს ფაქტს ადგილი აღარ ექნება. ის რაც მოხეს სკოლაში, სამწუხარო ფაქტია, მაგრამ ამ ამბის კარგი მხარე ისაა, რომ მოსწავლეები სოლიდარულები არიან ერთმანეთის მიმართ და ნამდვილად ძალიან კარგი მომავალი თაობა გვყავს",.

შეგახსენებთ, ორი დღეა, ადიგენში, სოფელ მოხეში, მუსლიმი მოსწავლეები საპროტესტო აქციებს მართავენ. მოხეს სკოლის მუსლიმი მოსწავლეები დირექტორის მხრიდან მუსლიმი გოგონასთვის თავსაბურავის მოხდის მითითებას აპროტესტებენ. მოსწავლეები ამბობენ, რომ ამ ქცევით დირექტორმა მუსლიმი აღმსარებლობის მოსწავლეებს შეურაცხყოფა მიაყენა, ეს მათი დისკრიმინაცია იყო და ამიტომ, მომხდარით განათლების სამინისტრო უნდა დაინტერესდეს.

[sknews.ge]