რატომ ითიშება შუქი ხშირად

ელექტროენერგია ქალაქს დღესაც, 12:00 საათზე შეუწყდა. თუმცა მიწოდება მალევე აღდგა. ’ენერგო-პრო ჯორჯიაში’ ამბობენ, რომ დღეს ხაშურის აქეთ სისტემა იყო გამორთული.

რაც შეეხება ზოგადად ხშირ გათიშვებს, კომპანიაში ამას სარეაბილიტაციო სამუშაოებს უკავშირებენ.

’მუშაობა მიმდინარეობს მაღალი ძაბვის ელექტროგადამცემ ხაზებზე და მიწისქვეშა კაბელებზე, იცვლება დაზიანებული მონაკვეთები, ასევე მიმდინარეობს პროფილაკტიკურ-სადიაგნოსტიკო და სარეაბილიტაციო სამუშაოები მაღალი ძაბვის ქვესადგურებში’, - განაცხადა ’ენერგო-პრო ჯორჯიას სამხრეთ საქართველოს ფილიალის’ საზოგადოებასთან ურთიერთობის სამსახურის უფროსმა გიორგი ბალახაშვილმა.

მისივე თქმით, ამ ეტაპზე ამორტიზებული ხის საყრდენები ახალი რკინა-ბეტონის ბოძებით იცვლება. ასევე, მიმდინარეობს ტრანსფორმატორების მოძველებული დეტალების შეცვლა ახლით, ზეთის ჩამატება ან შეცვლა.

’ეს ხდება იმიტომ, რომ ჩვენს აბონენტებს მივაწოდოთ ხარისხიანი ელექტროენერგია 24 საათის განმავლობაში’, -ამბობენ ’ენერგო-პრო ჯორჯიაში’.

[ნუკა სტეფნაძე, ახალციხე]